O Parlamento e a RAG homenaxean en Ponteceso a Eduardo Pondal

A localidade será a última etapa da mostra itinerante da Cámara galega

A inauguración da exposición concluíu coa interpretación do «Himno Galego».
A inauguración da exposición concluíu coa interpretación do «Himno Galego».

A inauguración onte na biblioteca municipal de Ponteceso da exposición 51 páxinas das nosas letras acabou por se converter nunha homenaxe a Eduardo Pondal na que tomaron parte, ademais dun grupo de nenos da localidade, a presidenta do Parlamento Galego, Pilar Rojo; o máximo responsable da Real Academia Galega, Xesús Alonso Montero; o secretario xeral de Política Lingüística, Valentín García; o alcalde pontecesán, Lois García Carballido, e o xerente da Fundación Pondal, Xosé María Varela. Tamén acudiron outras autoridades como Marisol Soneira, vicepresidenta da Cámara Galega; José Manuel Mouzo, rexedor de Laxe, e a conselleira de Medio Ambiente, Ethel Vázquez, de paso na localidade para visitar unhas obras do seu departamento.

Foron os nenos os encargados de abrir -co poema Ponteceso- e pechar -cantando o Himno Galego- o acto que se desenvolveu entre os paneis que permiten lembrar aos autores que coma Pondal foron homenaxeados co Día das Letras Galegas. A mostra suma xa dous máis dos iniciais -ata 53- desde o seu nacemento e co seu paso por Ponteceso, unha visita chea de simbolismo como apuntou Rojo, pecha un percorrido itinerante que a levou tamén ata o estranxeiro antes de regresar ao seu fogar no Parlamento Galego. «É para nós unha honra ter aquí esta exposición e a todas estas persoas», dixo Carballido antes destacar a importancia de potenciar as letras galegas e símbolos como o Himno.

Tanto Alonso Montero, como García e Rojo tiveron palabras de recoñecemento para o Bardo de Bergantiños e de ánimo para os cativos alí presentes, dos que sinalaron que son o futuro de Galicia, da súa lingua e a súa cultura. O presidente da RAG fixo ademais unha apaixonada defensa da palabra -«o único partido ao que deberiamos pertencer todos é o partido da palabra»- e do idioma galego, apuntando que «o gran día de Galicia non é o 25 de Xullo, ese é o día Santiago Apóstolo, senón o 17 de maio, o Día das Letras Galegas, o día da palabra».

«Aproveitade o exemplo destes persoeiros porque todos eles fixeron moito por Galicia e no futuro tocaravos a vós», pediulles Valentín García, mentres que Pilar Rojo os animou a traballar porque, segundo explicou, entre o medio cento de nenos presentes onte, seguramente haberá algún escritor. «Ou escritora», engadiu animando ás rapazas a cumprir a petición de Marisol Soneira de dar máis visibilidade ás autoras galegas.

Antes de que a interpretación do Himno Galego -con todos os presentes en pé, salvo varios membros da corporación municipal de Ponteceso- puxese o punto final ao acto, a presidenta do Parlamento convidou aos rapaces a visitar o Parlamento Galego, «a Casa da Palabra».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

O Parlamento e a RAG homenaxean en Ponteceso a Eduardo Pondal