Malpica dará por iniciada con 36 candeas a súa programación do 25N, mais non é a única cita do día
20 nov 2025 . Actualizado a las 05:00 h.Xoves 20 de novembro e varias citas hoxe na Costa da Morte, ademais do acto ligado ao 25N en Malpica (ver máis abaixo):
Carballo • Quenda para o folk no Novembro con Música. Ás 20.30 horas, no Pazo da Cultura, concerto de balde da banda galego-belga Ialma, de 25.º aniversario. Colabora a Deputación.
Carballo • Suma vida o polígono de Bértoa. Ás 19.30, inauguración da nova delegación da empresa Seamo S.L, na nave A-11 da rúa Cobre. Disporán de pulpeira.
Cee • Ás 11.00, e baixo o paraugas da Semana do Medio Ambiente e o ciclo Eco de Sol de aAntena, acollerá o auditorio Baldomero Cores a proxección do documental O monte é noso. Vai da loita dos campesiños a finais dos 70 por recuperar a propiedade de montes comunais que traballaban.
Ponteceso • Dentro do Mes da Ciencia en Galego da Fundación Pondal está previsto un roteiro científico-literario con participación do módulo de forestal da EFA Fonteboa e alumnado do IES Eduardo Pondal. Principiará ás 09.00 neste centro. Irán ao Monte Branco.
Coristanco • Inclúe o Concello no seu programa de 25N un contacontos con Raquel Queizás: Romaría, ás 18.00 na biblioteca, con acceso gratuíto. Para rir, soñar e lembrar que os contos tamén falan de igualdade, respecto e coidado da contorna.
Malpica prende 36 candeas polas mulleres asasinadas
O Concello de Malpica dará por iniciado hoxe o seu programa en torno ao 25N, Día da Eliminación da Violencia contra a Muller. Será un acto de lembranza no que se convida a participar a toda a cidadanía, previsto para as 19.30 na praza Villar Amigo. Durante o encontro acenderanse 36 candeas en memoria e lembranza das mulleres asasinadas este 2025, xesto simbólico para manter vivo o seu recordo. Acompañado do lema Lembrámolas con luz, non con silencio, o acto quere subliñar a importancia de non calar ante esta realidade. «A convocatoria pretende visibilizar a dimensión social deste problema», traslada o Concello, que informa asemade de que o vindeiro martes, o propio 25N, terá lugar ás 12.00 a lectura do manifesto institucional que reafirma o compromiso malpicán.