Luis Insua, PP de Fisterra: «Este mandato foi unha perda de oportunidades para Fisterra»

Propietario dunha asesoría fiscal, contable e laboral, ademais de árbitro de fútbol, Luis Insua (Fisterra, 1992) releva a un histórico como José Manuel Traba e encabeza a lista do .

—Houbo que dar o paso.

—É un reto que asumo coa máxima ilusión e ganas, sobre todo para presentar unha idea de futuro para Fisterra e para os seus veciños. Imos a por todas, temos un grupo de xente nova, que vén a aportar, a traballar polo noso Concello. Queremos xuntar este novo grupo con xente con experiencia para facer unha boa engranaxe e tirar para diante.

—Levan ao exalcalde José Manuel Traba na lista, precisamente.

—Si, de número tres, é unha persoa válida, con experiencia. Hai catro anos conseguiu cinco concelleiros, aínda non conseguindo gobernar polo 4+2 de PSOE e BNG. Tanto el como Santi Insua teñen aínda moito que aportar.

—Foi daquela o PP o partido máis votado. O obxectivo este ano é a maioría para poder gobernar?

—Efectivamente. Vemos na maioría absoluta a única forma de poder chegar ao goberno. Hai ter en conta que temos en fronte a tres forzas que son máis de esquerdas, así que o lóxico de non acadar nós os seis concelleiros, serían unha alianza de tripartito. E se xa Fisterra vai como vai cun bipartito, non quero imaxinar cun tripartito. De todas formas, será a veciñanza a que elixa, nós o que temos é que traballar para que nos vexan como a mellor opción para poder acadar o obxectivo.

—Que balance fai do mandato?

—Sinceramente, os últimos catro anos foron unha absoluta perda de oportunidades. Seguimos a ser un concello de referencia, cabeza visible da nosa comarca, pero non se fixo nada por explotar os nosos recursos. Seguimos nunha deriva permanente, funcionando a base de impulsos e improvisacións. Tema infraestruturas, aí está o pavillón: non se pode chegar a esta situación cunha infraestrutura tan básica, tendo que ir os nenos xogar aos pavillóns doutros concellos. Temos estradas desfeitas, o rural abandonado... Non hai máis que ver Sardiñeiro. O turismo, clave para Fisterra, está moi pouco traballado, imos a feiras como Fitur cun discurso de cinco minutos e baixo o paraugas doutros concellos.

—E que propostas traen?

—Un programa ambicioso e realista, diferenciado por áreas. No turismo, por exemplo, é preciso desenvolver o plan especial do monte do Cabo. En infraestruturas, para empezar, un plan de limpieza e arranxo de viais. En deportes, a posta en marcha dun ximnasio municipal... Levamos moitos proxectos.

---

---

---