O acto celebrarase o domingo no seu Segufe natal,?en Seavia, no Concello de Coristanco
03 jul 2008 . Actualizado a las 02:00 h.O próximo domingo terá lugar unha homenaxe á polifacética coristanquesa Asunción Antelo Suárez, máis coñecida como a Rexoubeira de Bergantiños. Con 88 anos, Asunción é campesiña, escultora, oleira, canteira e escritora. Promovido pola entidade cultural San Mamede (de Seavia), a Asociación Monte Branco de O Couto e a Asociación Amigos e Amigas de Asunción Antelo Suárez, o acto estará presentado pola xornalista Cristina Abelleira e pola filóloga Mari Carmen Pardiño.
Dolores Taibo Lavandeira, presidenta da entidade cultural San Mamede, adiantou en Radio Voz algúns detalles da homenaxe.
-¿En que consistirá o acto?
-Temos un programa moi completo, con xente que quere moito a Asunción e que a admira. Esperamos que asista o propio Neira Vilas, o cal é todo un luxo. Haberá un recital dos propios poemas de Asunción e teremos tamén actuacións musicais. Estarán, ademais, as cantareiras e bailadoras de O Couto. Finalmente, haberá unha exposición das obras e libros de Asunción.
-Para vostede, que tamén é de Seavia, ter unha veciña como Asunción Antelo, será un verdadeiro luxo.
-Si, dende logo. De feito, penso que esta homenaxe xa se tiña que ter feito moito antes. Foise deixando por un motivo ou outro pero a verdade é que é unha homenaxe moi merecida. Estamos moi orgullosos de ter a Asunción como veciña nosa e queremos que a partir de agora xurdan moitos máis proxectos coma este incluso por parte doutras entidades.
-¿A homenaxe farase na casa de Asunción?
-A homenaxe será no propio museo dela, a súa casa, efectivamente.
-En realidade trátase de homenaxear a unha muller que descubre o bolígrafo e a libreta ós 40 anos e que, a pesar diso, hoxe xa ten publicadas varias obras.
-A verdade é que o caso de Asunción, se non é único, polo menos si que é excepcional. Ten moito mérito todo o que fixo esta muller. É un ser excepcional que se interesa por Bóveda, que talla a madeira e o barro e que, sobre todo, ten unha cultura que me deixa abraiada.
-Estamos falando dunha muller autodidacta.
-Asunción é como unha biblioteca, aprendes moitísimo ao lado dela.
-Unha homenaxe moi merecida, dende logo. ¿Canto tempo levou preparala?
-Pois a verdade é que moi pouco. Só hai que ter ganas. Eu xa tiña a idea dende hai algún tempo, pero non podía facer todo soa.
-Será, sobre todo, un acto moi emotivo para Asunción Antelo.
-Claro, porque son os seus veciños os que puxeron todo en marcha. É unha homenaxe da súa terra, dos que queren a esta muller.