Logo de Vimianzo e Corcubión, a cita deste sábado será no porto de Malpica
09 jun 2026 . Actualizado a las 05:00 h.O ciclo provincial Escora Danza botou a andar o sábado en Vimianzo e continuou o domingo por Corcubión, na que é a súa xa quinta edición na Costa da Morte. Dende a capital de Soneira valoraron como «extraordinaria» a acollida da cita, xa sexa pola emoción que levaron os coros parroquiais de Cereixo e Carnés ou pola danza de Eva Comesaña, no que foi «un fermoso encontro entre tradición e creación contemporánea».
A continución, a prestixiosa artista francesa Claire Heggen, con máis de 50 anos de traxectoria e investigación sobre a teatralidade do corpo en movemento, subiu ao escenario por vez primeira en Galicia con Ma p’tite dame, unha poética exploración sobre o envellecemento e o silencio que envolve aos maiores. No horizonte, a cita máis inminente de Escora será en Malpica, ás 19.00 horas deste sábado 13 de xuño no porto: alí poderase gozar das artes circenses con Martaalonsotejada e do espectáculo tecido por Ruth Balbís e Raigañas: O. Que todo volva comezar.