Axenda diaria | Teatro, literatura, conciencia ou audiovisual tamén se suman ás propostas da xornada
14 nov 2025 . Actualizado a las 05:00 h.Ademais da peza teatral da Mostra de Malpica, outra das paradas importantes deste venres 14 de novembro estará en Carballo, onde bota a andar con dúas citas o programa municipal Novembro con música. A primeira das propostas será ás 21.00 horas no Pazo da Cultura, neste caso unha iniciativa da Consellería de Cultura, Lingua e Xuventude coa que colabora a área de Cultura. Trátase dun ciclo de concertos homenaxe ao compositor Xoán Montes: Xoán Montes ao piano reunirá aos intérpretes Javier Ares, Jorge Briones e Pablo Diago. O acceso é libre ata completar aforo. A segunda das propostas está prevista no local social da asociación San Campio de Cances —organizadora—: é a 19.ª edición do festival Live in Cances, que dende as 22.00 reunirá aos grupos The Cerne, 12 Labirinto e Plástico.
Carballo • Ás 12.15, no Fórum, gala de entrega dos recoñecementos Vilas en Flor.
A Laracha • Segunda parada do ciclo Venres Teatrais impulsado polo Concello. Na Casa da Cultura, ás 21.00, Un deus salvaxe, de Talía. Entrada de balde, ata encher aforo.
Cee • Na Casa da Cultura, ás 20.00, presentación do último libro de Mohamed Safa: Gaza, un xenocidio televisado. Estarán canda el Margarita Lamela e Modesto Fraga, en presentación de Medulia.
Vimianzo • Remata o ciclo de proxeccións Mestre Mateo, organizado pola Academia Galega do Audiovisual. Na Casa da Cultura, ás 20.00 horas, quenda da longametraxe de ficción Honeymoon.