Prioridades


Seica hai ruído de sables estes días na capital por mor dos resultados electorais do domingo en Galicia e País Vasco, mais tamén por outros intereses ou estratexias que deixan ao descuberto o mar de fondo que vive un dos partidos referenciais do noso sistema. Mais este tipo de situacións e diverxencias son bastante comúns nas organizacións políticas; o que cambian son as formas, os tempos e, sobre todo, os intereses dos poderosos grupos mediáticos á hora de magnificar o enfrontamento. A crise dos socialistas a nivel estatal non é moi diferente á que viviu o nacionalismo galego, con escisións que deron lugar á creación de novos partidos como AGE, CxG ou En Marea. E xa antes o CDS, de Adolfo Suárez. É evidente que a situación política e social mudou moito nos últimos anos e, como consecuencia disto, unido á profunda crise económica que vivimos e a un comprensible fastío na clase dirixente acabou propiciando un cambio na mentalidade e nas prioridades da cidadanía. Á xente de a pé non lle preocupan o máis mínimo as disputas de poder entre Susana Díaz e Pedro Sánchez, entre Iglesias e Errejón, entre Rajoy e Aznar ou entre os diferentes bandos en lide. O común dos mortais está máis preocupado por chegar a fin de mes, por atopar un emprego e por facer números para afrontar os gastos do día a día. Ninguén fala hoxe das elevadas taxas de desemprego que seguimos a ter unha vez rematado o período estival, nin da situación de emerxencia que atravesan os nosos sectores pesqueiro e marisqueiro, nin do secular abandono que padece a bisbarra. Debe ser porque xa rematou a campaña e, xa coas súas señorías comodamente sentadas nos seus escanos, estamos a outra cousa; máis pendentes do que sucede na capital que no importante. E así nos vai.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Prioridades