Estrelas


Oluns pola noite, máis de 300 persoas seguiron á ruta das estrelas que organiza cada ano o Concello de Cabana e guía Jorge Mira. Fascinante tal morea de xente ávida de aprender os nomes e o sentido de todos eses puntiños que pululan aí arriba. Impensable esa cifra hai 30 anos. Que digo 30: 20. O ceo era unha mera cuberta da que ninguén che explicaba nada nin tiñas maneira de aprender, máis algo do Cosmos de Sagan, debuxos animados, e toda a a imaxinación que lle botabas ao ir a escola, vendo Venus desaparecer, ou ollando entre follas cortantes de millo cando, nas noites de outubro, o aire é máis claro e os astros parece que medran.

E agora... Agora, o iPhone avísame cando a Estación Espacial Internacional pasa por riba de Zas ou de Carballo (elixo as coordenadas, naturalmente). Outro puntiño a 400 quilómetros de altura que pasa veloz como unha estrela fugaz, e que leva xente dentro, e leva tamén moita ciencia que nos fai a vida mellor. E cando pasan os avións tintineando, se é de noite, o móbil dime o modelo, a orixe, o destino, altura, velocidade, matrícula rumbo... Sabes cando voan por riba de ti exactamente. Non hai segredos xa. Rompeuse a maxia. Como cos astros. Orientas a pantalla cara onde queiras e aparecen todos cos seus nomes, as distancias, a composición química. Só lle falta o patrocinio.

Así están as cousas no espacio agora. Cos planetas e cos avións. Todo baixo control. E aínda así, cada vez vai máis xente a que llo expliquen. Para recuperar aquela maxia.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

Estrelas