O vigués Luis Enrique Correa Piñeiro, Luis O Caruncho (38 anos), participou o martes, xunto co seu compañeiro Pinto D'Herbón, nun obradoiro de regueifa organizado pola fundación Eduardo Pondal ao que asistiron os alumnos do instituto de Ponteceso. Foi unha xornada aberta á improvisación, na que os rapaces gozaron da música tradicional e da arte de discutir en verso.
-¿Como foron os seus comezos?
-Empecei coa música tradicional (toca a zanfona) e sempre me gustou variar sobre a marcha as letras das cantigas. Hai uns dez anos, nun encontro de improvisación coñecín ao meu compañeiro Pinto e aí empezou unha relación que dura ata hoxe.
-Hai quen pensa que a regueifa é algo pasado de moda, sen futuro.
-Pero están equivocados, porque agora mesmo hai bastante xente da miña idade e incluso máis nova que está metida neste mundo, así que penso que o futuro inmediato da regueifa está asegurado grazas ao empeño de moitas asociacións como a fundación Pondal, que están a facer moito pola súa conservación. A regueifa ten moito poder, porque é algo inmediato que se adapta a todo tipo de actividades e espectáculos.
-¿Que tal é traballar cos rapaces?
-A mellor idade é a comprendida entre quinto de primaria e terceiro da ESO, porque traballaban sen complexos, sen medos. Para eles é unha actividade fantástica, porque exercen a mente, agudizan o inxenio, aprenden vocabulario e tradicións e gañan en axilidade. Todo son vantaxes.