ÁGORA | O |
21 abr 2003 . Actualizado a las 07:00 h.EMPEZOU A presentación de candidaturas e os partidos fan as fotos de familia nas que saen todos guapos: eles de garavata e elas de traxe de festa. Estou moi contenta porque na maioría das fotos vense moitas mulleres, parece que por fin algúns políticos túzaros da Costa da Morte comezan a comprender, non lles queda outra, que estamos para algo máis que para estar metidiñas na casa. Sei dun que ten máis de carneiro que de político, que anda laiando polos bares dicindo que a onde imos parar. Entre viño e viño despotrica contra as mulleres que van de candidatas a alcaldesas e, en xeral, contra tódalas que non van de suplentes ou en postos de recheo. No fondo o que ten é envexa, o pobre quedou fóra da lista do seu partido porque este ano entraron cinco mulleres. Agora fai a súa particular precampaña. De tasca en tasca, orneando que «onde imos parar con tantas políticas». ¡Meu pobre!