Hai momentos nos que unha realidade económica comeza a percibirse nas rúas e, pouco despois, as cifras veñen refrendala. É o que parece estar acontecendo estes meses no Barbanza. No que vai de ano creáronse 117 novas sociedades na comarca, unha media de catro cada semana, e Boiro lidera esa creación con 18 novas empresas. Ao mesmo tempo, o paro reduciuse ata a metade do que había hai unha década.
Empresas que nacen, emprego que se crea e persoas que atopan oportunidades. Distintas caras dunha mesma realidade que tamén se pode ver este verán. Boiro practicamente duplica a súa poboación, as rúas énchense, as terrazas tamén e os negocios viven semanas de especial actividade. Pero eses visitantes que chegan non só consumen: participan, descobren, gozan e forman parte das propostas e da vida da vila.
Quizais por iso estes días resulte inevitable pensar en Here comes the Sun, dos Beatles. A canción converte a chegada do sol nunha metáfora da aparición da luz despois dun tempo difícil. Non estamos, por suposto, ante unha realidade perfecta. Emprender segue sendo difícil, manter un negocio require esforzo e quedan moitos retos por resolver. Pero tamén debemos saber recoñecer os sinais positivos cando aparecen.
E en Boiro son varios: novas empresas, menos desemprego, máis actividade e un tecido empresarial que continúa fortalecéndose. Hai poucos días, a ABE alcanzaba tamén unha cifra simbólica: 222 empresas asociadas. Máis alá do número, fala dun tecido empresarial que medra e dunha vontade de relacionarse, colaborar e formar parte dun proxecto común.
Porque cando unha empresa nace precisa dun territorio no que medrar; cando medra, precisa doutras empresas, clientes, provedores e persoas; e cando todos se conectan, o resultado é algo máis que a suma das partes. É unha comunidade.
E esa comunidade non está formada só por quen vive aquí todo o ano. Tamén por quen regresa cada verán, por quen conserva aquí a súa segunda residencia ou por quen escolle Boiro para pasar uns días. Durante estas semanas forman parte da nosa vida e contribúen tamén a manter viva a actividade económica.
Boiro está vivindo un momento no que os datos e a realidade das rúas parecen falar a mesma lingua. Hai máis actividade, máis xente, novos proxectos e máis oportunidades. Quizais por iso estes días, cando sae o sol e as rúas se enchen, a metáfora dos Beatles cobra todo o sentido. Here comes the sun.