A nova proposta ofrece coleccións tan dispares como «A oca dos artistas» ou «A imitación de Cristo», con láminas do XVII
07 oct 2023 . Actualizado a las 21:00 h.O Museo Gravado de Artes tivo este venres unha dobre cita cultural coa inauguración de dúas exposicións simultáneas: A Oca dos artistas e A imitación de Cristo, de Thomas A. Kempis.
O acto comezou ás 20.00 horas cunha intervención na que Xoán Pastor Rodríguez, responsable do recinto expositivo, explicou aos presentes as características destas dúas mostras, moi diferentes entre si, xa que unha está formada por gravados contemporáneos e a outra por láminas do século XVII.
Sobre a máis actual, sinalou que cada un das láminas representa os distintos cadrados do xogo do ganso, e que cada un foi creado por un artista diferente. Así mesmo, falou da relación histórica que algúns expertos defenden entre o Camiño de Santiago e este tradicional pasatempo, no que as 63 celas que separan aos aspirantes da vitoria poderían simbolizar as múltiples paradas dos peregrinos durante a súa travesía de ida e volta.
Segundo o director do museo, o que verán todos aqueles que decidan visitar as súas instalacións «é o produto da colaboración entre artistas plásticos, músicos e poetas en 2006 que se expuxo por primeira vez en Roquetas de Mar (Almería) logo da súa presentación na Biblioteca Nacional de Madrid».
En canto á segunda exposición, revelou o importante valor cultural destes gravados, que foran empregados no seu tempo para unha das numerosas reedicións de A imitación de Cristo, unha das obras relixiosas máis lidas do mundo por detrás da Biblia. «Este é un dos libros de espiritualidade de Occidente máis populares dende comezos do século XV. Coñécense máis de 2.000 edicións en varias linguas», afirmou.
O seguinte en intervir foi o vicepresidente o padroado do museo Javier Expósito, que contou aos asistentes como se logrou traer obras de tal relevancia cultural.
O máis complicado foi acceder aos gravados do XVII. A continuación falou o alcalde, Luís Pérez, que resaltou grande importancia de que os veciños poidan acceder de maneira gratuíta a obras de tan alta calidade.
Expresou o orgullo que supón para o municipio que moitos dos fondos que se van conseguindo adoitan ser pedidos por outros museos nacionais e internacionais o que proba a súa capacidade de influencia. Por último, a deputada provincial de Igualdade e Lingua, Soledad Agra, agradeceu a Pastor Rodríguez e os seus compañeiros o seu labor.
Visita internacional
As alegrías seguiron sumándose onte, cando as instalacións ribeirenses recibiron a visita do director dos Museos de Ausburgo, Cristof Trepech e a profesora de fotografía alemá Marie Stallforth. Despois de ser recibidos polo alcalde e presidente do Padroado do museo, Luís Pérez, o vicepresidente, Javier Expósito, e o director, Xoán Pastor Rodríguez, percorreron as diferentes salas, nas que puideron admirar obras de artistas como Picasso, Dalí, Goya, Piranesi ou Laxeiro.
A delegación estranxeira confirmou que a primeira exposición que levarán a Alemaña será a Os caprichos de Goya e Dalí. Ademais, tamén asinarán un convenio de colaboración con nove salas de Ausbrugo.