Sereas de Sálvora


Estupor e temor no mar de Arousa. Na profunda noitebra brúa a masa salgada estremecendo os seus fondos mariños nunha marusía endiañada. A matriarca, Sálvora, está rodeada dunha gran familia de baixíos e illotes pétreos, todos nun beixo inmorredoiro coa ondada que efusivamente e con paixón desmedida en varias ocasións, agarima a Lapegar, Sagres, Noro…

Nesta paraxe de soños, lendas e hipocampos permanece gravada a data do 2 de xaneiro de 1921: nesa noite invernal e co azoute dun intenso temporal, o vapor Santa Isabel con 266 persoas vai a piques preto de Sálvora.

O 4 de xaneiro de 1921, o xornal El Orzán, entre outros, recolle a noticia do naufraxio titulándoa, «Una tragedia horrenda», e comeza a ampla crónica coas seguintes palabras: «Escribimos bajo una impresión dolorosísima, verdaderamente consternados por la magnitud de la catástrofe del Santa Isabel...»

Fronte a un océano que na noite negra amosaba a súa faciana máis tétrica, unha diminuta embarcación avanzaba sobre o vaivén tumultuoso das ondas. Tripulaban a dorna salvavidas tres mulleres, aínda nenas, na procura de laios desesperados. Mentres, outra ía na procura de axuda en terra.

O seu obxectivo era tentar salvar o maior número posible de vidas. Impresionante a súa valentía, imposible na actualidade un acto semellante; realmente, os escintileos do tempo nin en soños nos deixan visualizar tan impresionante actuación.

Elas son as heroínas de Sálvora que, coa súa valentía, lograron que a catástrofe do Santa Isabel non segara máis vidas nun naufraxio con 213 vítimas mortais, nunha noite de temporal sen parangón.

Cipriana e Josefa, María e Cipriana, sen dubidar e arriscando a súa vida, loitaron con todas as súas forzas no fío da onda asasina, e coa desesperación dos náufragos tentando salvar o maior número de vidas.

A súa heroicidade non é comparable. O seu tesón e valentía foi dunha magnitude que impresiona só con lembralo. Nos soños destas mulleres quedou impregnada esa noite de temporal, e o seu foi un pesadelo vital, mais, para todos nós, o seu exemplo permanece no ar de Sálvora expandido nun halo de recoñecemento unánime para tan impresionante xesta.

Na memoria, por sempre...

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Sereas de Sálvora