O mar ponse ao alcance de todos

Máis de catro mil persoas con discapacidade embarcaron no veleiro de Cogami

M. X. B.
ribeira / la voz

Corría o ano 2002 cando un veleiro dedicado ao narcotráfico era incautado nas rías galegas. Agora, 17 anos despois, este mesmo barco encárgase de achegar o mar ás persoas con discapacidade. Hai uns días puido verse por Camariñas. Esta iniciativa é posible grazas a Adisbismur (Asociación de Persoas con Discapacidade da Bisbarra de Muros). Ramón Sestayo, nado en Muros, é o seu presidente. Conta como foi o arranque deste proxecto: «Muros é unha vila mariñeira, mais para as persoas con discapacidade, o mar era un ámbito no que era imposible traballar ou mesmo ter acceso a el». Dende que naceu esta asociación no 1982, lóitase por darlle visibilidade ás dificultades que teñen as persoas con discapacidade para gozar do xigante azul.

Despois de pedirlle á Audiencia Nacional aquel barco incautado procedente do narcotráfico, o Laion navega cada verán polas rías galegas. Este é un proxecto sen ánimo de lucro, no cal aqueles que exercen de patróns non son máis que meros voluntarios que pretenden achegar a súa sabedoría aos que se animan a embarcar.

Dende os seus comezos, a embarcación de Adisbismur, que é xestionada por Cogami (Confederación Galega de Persoas con Discapacidade), xa achegou o mar a máis de catro mil persoas con diversidade funcional. Son douscentos os pasaxeiros que cada verán poden estar máis preto da navegación grazas a esta iniciativa. Deste xeito, o programa converteuse nunha das ofertas de lecer máis solicitadas por parte dos usuarios de Cogami.

Os chamados bautismos de mar son travesías a vela. O Laion ofrece esta posibilidade organizando quendas de oito persoas, con percorridos de ata tres horas polas rías galegas. A finalidade non é outra cá de aprender todo tipo de actividades marítimas, como a navegación a vela, o manexo do temón, a elaboración de nós náuticos e mesmo o vocabulario propio do gremio.

Do interior de Galicia

Os dispositivos cos que conta o veleiro, desde o guindastre ata os asentos, están adaptados, de xeito que permiten a implicación nas actividades náutico-deportivas a todas aquelas persoas que non tiñan ate o momento a posibilidade de facelo. A embarcación, de 13 metros de eslora, ten unha capacidade máxima para 10 persoas, das cales dúas son os tripulantes e outras dúas, acompañantes.

Ramón Sestayo, responsable de Adisbismur e vicepresidente de Cogami, tamén conta como «o proxecto permitiu que xente do interior de Galicia que non estaba familiarizada co mar, puidese acceder a el». É por isto que Cogami tamén colabora con outras entidades con obxectivos similares, entre as que están Misela de Noia ou a Asociación da Disvalía de Valdeorras.

Unha das metas máis relevantes que se conseguiu no marco do proxecto Gavea (Galicia Vela Adaptada) foi que «a industria do mar se comezase a cuestionarse este tipo de problemáticas, xa que grazas á visualización que estamos tentando dar, algúns portos e clubs náuticos están comezando a adaptar as súas actividades e instalacións a este tipo de necesidades». Tal é así que mesmo portos deportivos situados polas diferentes rías galegas prestan os seus amarres para facilitar a navegación desta embarcación.

Mais as travesías do veleiro adaptado Laion non só se limitan ás rías galegas, senón que este barco xa navegou polo mar Cantábrico e polas costas de Cataluña e Valencia, percorrendo case por completo o litoral español.

A felicidade cos obxectivos acadados grazas á embarcación adaptada é notable, pois este veleiro está moito máis preto de cumprir o soño polo que naceu: «Pretendemos avanzar cara a accesibilidade total no campo marítimo e darlle a máxima visibilidade», apunta Sestayo.

O veleiro. O Laion foi incautado ao narcotráfico no ano 2002 e cedido a Adisbismur, colectivo membro de Cogami.

O proxecto. O barco conta con dispositivos adaptados que permiten aos seus pasaxeiros participar nas actividades propias da navegación.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O mar ponse ao alcance de todos