Xa están aquí


Coma cada ano volven os turistas ás nosas cidades, e con eles o barullo ausente no resto do ano. Non sei se onde viven a diario levan esa axitada vida, ou non saben desconectar, porque o balbordo comeza ás dez da mañá e non remata ata as catro da madrugada seguinte. A súa conduta semella a dunha colonia de cabalos desferrados.

Xa pola mañá, o ruído dos labores previos á marcha para a praia recórdanos a algarabía dos corredores de bolsa antes da súa informatización. Pais, nais e rapaces berrando toda a mañá por asuntos relevantes como un traxe de baño, un iogur ou unhas chancletas. Parece que non dan saído para a praia, na que seguirá a troula.

Menos mal que adoitan xantar fóra da casa e durante unhas horas os veciños dos edificios con pisos turísticos poden descansar. Pero á tardiña volve a manda á base e a esmorga segue: que se a ducha, que se a calor, que se alguén se queimou, que se a cea. Pero, como no verán Galicia é unha verbena continuada, trala parva da noite saen de foliada outra vez. E deixan o can na casa, que ladra e ouvea porque non está afeito a ficar só nunha casa allea, xusto cando o resto de residentes pretenden conciliar o sono. Xa cando o cadelo se aburre de predicar no deserto, e o edificio está en paz, acaba a festa e regresan, como elefantes nunha cacharrería, vociferando, batendo as portas, sen respecto ningún pola xente que dorme.

Con esta irrespectuosa conduta, os veciños que traballan acaban cheos deles. Non quero imaxinar como é a vida normal dunha familia en cidades turísticas. Así xorden as protestas en lugares que son xa inhabitables.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
10 votos
Tags
Comentarios

Xa están aquí