José Ramón López, Mon: «O primeiro é formar persoas»

O dirixente aposta por alcanzar nuns anos a liga EBA cun bloque sénior formado por rapaces da canteira


Ribeira / la voz

José Ramón López, Mon, (Noia, 1974) leva unha vida atado ao baloncesto. Comezou lanzando á canastra cando era un adolescente e agora segue dende a distancia o que acontece no parqué. Faino como director deportivo dun dos conxuntos máis importante da zona, un Club Baloncesto Noia que segue medrando.

-Seguen abrindo fronteiras, ¿como foi o comezo da tempada?

-Moi ben. Nestes intres estamos nun momento de expansión. Tivemos un crecemento de máis do 40 % no número de rapaces. Estanse facendo as cousas ben e o club quere medrar ano o ano. No eido deportivo, os tres conxuntos sénior están ben colocados. O primeiro equipo con opcións de fase de ascenso, o feminino vai líder e o terceiro conxunto tamén loita por todo.

-¿Un 40 %? ¿A que cre que se debe ese incremento?

-Creo que se traballa ben. Partimos da base de que somos un club formativo, polo que o primeiro é formar persoas e despois deportistas. Neste club teñen sempre unha saída, poden comezar sendo nenos e alcanzar o sénior sen ter que mudar de conxunto. A maiores, dende que entrou esta directiva fomentamos o trato coas familias, impulsando actividades ao longo do ano, como pode ser Halloween ou fin de ano, así como a creación dun equipo para nais. Todo iso fai que sigamos medrando.

-Esta directiva leva tres anos á fronte do club, ¿como foron?

-Creo que nun primeiro momento, visto o traballo da anterior, sabíamos que era complicado manter a traxectoria, porque se viñan facendo as cousas moi ben. Creo que se aportou unha visión e ideas diferentes. Seguiuse mantendo o nivel deportivo e aumentouse o social.

-¿Ten teito o C.B. Noia?

-Estamos arredor das 200 fichas, pero cremos que podemos darlle cabida a 50 rapaces máis. Ese sería o noso teito. A partir de aí teriamos problemas de instalacións. Estamos falando co Concello para que nos axude nese senso, pero sabemos que os pavillóns non caen do ceo. Temos a súa colaboración e son sensibles ao que propoñemos.

-¿Que saúde ten o baloncesto nesta zona?

-Goza de boa saúde. Hai moitos nenos practicando o noso deporte en todos os pobos da redonda. Boiro, Ribeira ou o noso son clubs que levan traballando toda a vida para que non se perda.

-Son un dos poucos clubs que teñen todas as categorías.

-Fáltanos o júnior feminino, pero para o ano esperamos telo. Somos un club que contamos con equipos de rapaces e rapazas, e iso é un valor engadido. No fútbol, por exemplo, só hai mozos, polo que o noso abano é algo máis amplo.

-¿Pensa en chegar á liga EBA co sénior masculino?

-Gustaríanos, pero queremos facelo coa nosa xente. Veñen por diante boas xeracións, rapaces que poden competir a ese nivel. O noso club está aberto a todo o mundo, pero a nosa política non é a de fichar 14 xogadores para subir de categoría.

-Ao final é pan para hoxe e fame para mañá.

-Na última década púidose ascender tres veces, pero sempre o descartamos polo aspecto económico, xa que esixe un aumento orzamentario considerable. Para facelo debería ser con máis do 50 % do equipo procedente da nosa canteira. Creo que sería un orgullo. Estamos traballando niso e pode tratarse dunha realidade a curto ou medio prazo. Penso que entre dous ou catro anos poderíamos dar ese salto. Hai que ver como saen as cousas, como se compite ata ese momento.

-¿E co sénior feminino?

-Despois do bloque que conseguimos xuntar poderíase dar un salto e xogar en Primeira División. É algo secundario, porque o que queremos é que as nenas non cheguen aos 16 anos e teñan que abandonar o baloncesto. Se o fan é porque así o deciden, non porque non teñan onde xogar.

-Falando do aspecto económico, ¿como está o club?

-Este é un club saneado. Contamos cun apoio moi importante do Concello, e este ano tamén da concellería de Turismo para darlle pulo ao Portus Apostoli. Para nós é importante, pero detrás tamén está o esforzo da directiva, de buscar patrocinadores.

-Levan tres anos, pero entendo que precisan máis tempo para acadar os seus obxectivos.

-Este é o primeiro ciclo, pero a idea é alongalo no tempo para tratar de colocar ao club onde cremos que debe estar.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

José Ramón López, Mon: «O primeiro é formar persoas»