Fernando Siaba: «A saída é ter plans de explotación para traballar de forma continua»

Sen lonxa e con poucos socios, a supervivencia da entidade resulta complicada debido á falta de ingresos


Ribeira / La Voz

A crise propiciou que, hai seis anos, Fernando Siaba Espasandín mudara o seu traballo no sector de artes gráficas pola actividade no mar, dedicándose a coller percebe e poliquetos: «A empresa pechou e tiven que facer un cambio de vida radical». Non obstante, sempre estivo vinculado ao sector, porque toda a súa familia traballa nel. As eleccións ás confrarías convertérono en patrón maior, un labor nada doado nunha entidade con tan poucos recursos como a do Pindo.

-Ser mariñeiro no Pindo require moito esforzo?

-Hai que pelexar moito. Eu conseguín o pérmex do percebe, pero só con iso non se vive. Tiven que facerme tamén co dos poliquetos para poder saír máis días ao mar e facer un salario. A extracción de crustáceo é temporal, son xornadas puntuais. De feito, as dificultades para que a xente poida sacar un salario é o principal problema que temos na nosa confraría.

-Non hai moitas persoas dedicadas a coller poliquetos.

-Aquí somos oito. Temos case 200 días de traballo. Ten bastante saída para a pesca deportiva. Vendemos a distribuidores. Nesta zona collemos gabilán ou catalá, que é un tipo de miñoca moi boa. Trátase dun mercado bastante pechado, pero existe demanda.

-Como ve o futuro da confraría do Pindo?

-É bastante complicado. A saída é ter plans de explotación para traballar de forma continua. Iso permitiría que os mariñeiros non marchen. Estamos agardando a ver se a Consellería do Mar nos dá permiso para comezar coa extracción de ourizo e tamén queremos desenvolver un plan para as algas.

-Que impide poñer en marcha a recollida de algas?

-Non conseguimos compradores. Temos algas tanto para uso alimentario como cosmético. O plan xa leva tempo aprobado e parecía unha oportunidade, porque estaba collendo moito pulo. Falamos con empresas, pero non chegamos a acordos e querémolo intentar de novo

-Non teñen máis recursos?

-Tamén collemos mexilla para os bateeiros. A campaña empeza en decembro e prolóngase ata o mes de abril. Imos en función dos pedidos que haxa, pero o ano pasado foi moi malo. O importante é que teñamos á xente traballando e o ourizo pode ser unha salvación, porque deste xeito tería máis ingresos a entidade.

-E o turismo mariñeiro?

-Iso segue en pé, temos uns roteiros e facemos visitas para que a xente vexa como se colle o marisco, pero trátase de cuestións puntuais.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Fernando Siaba: «A saída é ter plans de explotación para traballar de forma continua»