Oitavo ano de Rubén no Cortegada, sen Chorén nin Antía

A renovación do técnico coincide coas saídas do club da base e da pívot por estudos


vilagarcía / la voz

Rubén Domínguez chegou á dirección do vestiario da A.D. Cortegada na tempada 2013/14. A partir do segundo verán a dinámica veu sendo a mesma. O club tardaba semanas, mesmo o seu bo par de meses, en confirmar oficialmente a renovación do técnico vigués pese a falar del como responsable do seguinte proxecto practicamente desde abril, coa conclusión de cada nova edición da Liga Feminina 2. A tónica este ano non diferíu o máis mínimo, coa volta ao calcetín que a pandemia do covid-19 lle deu a todas as parcelas da nosa sociedade facendo quizais máis comprensible a espera do anuncio oficial.

O vicepresidente e voceiro da directiva do Cortegada, José Gorgoso, daba fe onte do que todo o mundo consideraba xa feito: «Confirmado». Rubén Domínguez adestrará a vindeira campaña o Cortegada, no que será o seu oitavo curso á fronte da franquicia vilagarciá. Sempre na LF2, un intervalo no que o cadro arousán soñou unicamente unha vez con retornar á elite do baloncesto feminino español, naquela final en León virada en contra nuns fatídicos derradeiros cinco minutos fronte ao Movistar Estudiantes.

O oitavo proxecto de Rubén en Fontecarmoa conta co pulo do regreso de Sara Gómez ás canchas. Tras un ano de baixa por maternidade, a capitana e mellor xogadora arousá de baloncesto da historia volverá proporcionarlle ao Cortegada unha baloncestista diferencial. Unha peza de luxo que tanto pode cubrir o posto de base, no que se reconvertera nos últimos anos, como de escolta, no que cubríu a maior parte da súa longa carreira deportiva, que retomará con 34 anos.

Pola contra, Domínguez perde a dúas pezas da pasada tempada, ambas forxadas na canteira vilagarciá: Nuria Chorén e Antía Varela. A base fichou polo Rosalía compostelán para continuar competindo na LF2, á que vén de ascender. A pívot valguesa múdase a Oviedo. Nos dous casos, explican desde o Cortegada, por estudos. Dáse a circunstancia de que Nuria e Antía foran anunciadas hai exactamente un ano como primeiras fichaxes do club vilagarcián para a LF2 2019/20, procedentes do Pío XII santiagués.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Oitavo ano de Rubén no Cortegada, sen Chorén nin Antía