A decoración é o oficio no que Mary Tubío Agrafojo comezou a traballar por iniciativa propia e no que despois de varios anos síntese contenta e realizada.
-¿En que consiste o seu traballo?
-Acomodo escaparates e dedícome á decoración con globos de espazos para todo tipo de eventos.
-¿Como empezou?
-Foi case en broma. Probei coa voda dunha amiga e logo coa comuñón do meu sobriño, a raíz deso foron saíndo máis.
-¿Tiña algunha experiencia?
-En Venezuela fixera algo antes de vir e unha vez aquí, ao ver que funcionaba, empecei a formarme xa en serio facendo varios cursos sobre decoración con globos e o manexo de estruturas.
-¿Algún traballo que queira destacar?
-Fixemos o lazo xigante contra a violencia de xénero hai dous anos para un acto na Coruña; e en Noia encargámonos das decoracións de entroido e Nadal na alameda e no polideportivo.
-E na tenda, ¿que ofrece aos seus clientes?
-Regalo infantil e xuvenil. Agora mesmo as estrelas entre os nenos son Bob Esponja e o Patito Feo.
-¿Que lle desgusta máis do seu traballo?
-Ás veces teño problemas nos restaurantes máis tradicionais que non me permiten traballar; é unha sorte que non sexa o habitual.