Ata cinco equipos chegan á última xornada da Liga EBA inmersos na loita por eludi-lo descenso. Deles, o Viriato Rosalía é o que peor o ten, cunha victoria menos cos seus rivais, entre os que se atopa o Establecimientos Otero, co que se enfronta mañá no pabellón do Pombal. O técnico do cadro santiagués, José manuel Castro, non dubida do triunfo dos seus homes, o sétimo consecutivo de chegar a producirse. De feito, onte amosouse amplamente optimista dando case por feita a permanencia do seu equipo. E é que, ademais de contar coa victoria sobre os cambadeses, Castro agarda que «o San Sebastián perda ante o Patronato en Bilbao, dadas as necesidades deste último conxunto». Deste xeito, daríase un empate coma mínimo a tres bandas no que «sempre sairíamos gañando o Otero e mais nós». Non obstante, «nós imos a Cambados co obxectivo de vencer de 20 e asegurarnos así a permanencia automática».