«A investigación das causas dos TEA é para min unha liña prioritaria»

O reputado xenetista Ángel Carracedo clausura o congreso que reúne en Ribadeo arredor dun cento de pediatras


RIBADEO / LA VOZ

Ángel Carracedo Álvarez (Santa Comba, 1957), catedrático de Medicina Legal da Universidade de Santiago de Compostela (USC), investigador e experto internacional en xenética pronunciará hoxe, sábado, (12.30 horas) a conferencia de clausura do 70 Congreso Anual da Sociedad de Pediatría de Galicia (Sopega), que estes días reúne en Ribadeo a arredor de 110 pediatras de diferentes puntos de España. Desde a Sopega destacan o prestixio do xenetista galego, que co seu equipo teñen múltiples investigacións abertas sobre as causas dos trastornos do espectro autista (TEA): «A investigación das causas dos TEA é para min unha liña prioritaria e temos varios proxectos en marcha, apoiados por fondos de investigación nacionais e europeos, e pola Fundación María José Jove».

—A súa intervención versará sobre as bases xenéticas dos trastornos do espectro autista (TEA). En que centrará a ponencia?

—Os TEA son trastornos predominantemente xenéticos. Vou a explicar as bases xenéticas dos TEA, os xenes que sabemos que están involucrados, que xa son máis dun centenar e a importancia do diagnóstico xenético.

—Nesta ocasión dirixirase a un auditorio de pediatras que nos últimos tempos alertan do aumento de casos de TEA en nenos e nenas que tratan nas súas consultas. Coñécense as razóns deste incremento?

—Non ben. Suponse que ten varias causas, principalmente que se diagnostica máis, tal vez poda influír algo a idade maior dos pais, pero o que si é seguro e que as vacinas non teñen nada que ver.

—Cales son os sinais e cando poden aparecer os síntomas destes trastornos?

—O diagnóstico do TEA é un diagnóstico clínico, non xenético. É un trastorno do neurodesenvolvemento caracterizado por deficiencias na comunicación social e comportamentos restrinxidos e repetitivos.

—Fálase e escríbese moito destes trastornos, pero vostede que cre que é o máis relevante que deben coñecer tanto os pediatras como as familias?

—Eu vou falar da importancia do diagnóstico xenético. Nun 25 % dos casos pódese atopar a causa e iso é importante para asesoramento xenético nas familias, para anticiparse a comorbilidades e, nalgúns casos, para orientar terapias.

—E podemos coñecer algunha outra investigación na que estea volcado nestes momentos?

—Seguimos coas nosas liñas de investigación no cancro e en farmacoxenómica, intentando buscar ideas e fármacos novos ligados a medicinas personalizadas.

—E finalmente, vostede é científico, investigador, profesor e tamén divulgador científico. Con que faceta disfruta máis?

—Disfruto moito de todo o que fago, pero do que máis disfruto é cando estou na casa coa miña familia.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«A investigación das causas dos TEA é para min unha liña prioritaria»