Hoxe coñeceranse os gañadores do campionato no que ela compite, en Floristería
04 mar 2017 . Actualizado a las 05:00 h.Esforzo, concentración, competitividade, destreza, imaxinación, creatividade... Esas cualidades e máis, no seu máximo grao, son imprescindibles estes días en Soraia Barbosa Oliveira (Portugal, 1997), alumna do IES San Rosendo de Mondoñedo, que o dá todo no Spainskills, as Olimpíadas da Formación Profesional en Madrid que hoxe rematan, xa sen probas pero si sabéndose se gañou na súa modalidade que é a de Floristería, onde é a única representante galega, dentro do apartado de Artes Creativas. Falamos con ela tralo intenso segundo día de competición. Quedaba un, o de onte, por celebrarse. Anda nese intre de compras en Primark coa profesora que a acompaña, aproveitando o pouquiño rato libre que lle queda na xornada.
-Que traballos fixo xa?
-O primeiro día tocou facer un vestido (estilo libre) e no segundo un ramo en xarrón estilo barroco. Podemos elixir a flor.
-E cales escolleu?
-Para o ramo anthurium, antirrhinum, crisantemo verde, eucalipto...
-Eucalipto? Moi da Mariña!
-Tamén rosa vermella, branca e cimbidium. No caso do vestido, a parte de arriba fíxena con margarita e a de abaixo con aspidistra, pétalos de rosa e cimbidum.
-E canto tempo tiñan para facelo?
-De 9.30 a 13.00 e de 15.30 a 18.30.
-Xa tiña idea previa do que quería facer ou foi en plan sorpresa?
-Chegamos e dixéronnos que flor tiñamos, repartímolas e ao día seguinte nos dixeron, por exemplo, de facer o vestido, o que ías a utilizar. Foi coller o material e empezar a facer. Tiñamos que facer un bocexo tamén antes de empezar a traballar coa flor.
-Vese ben na competición?
-Si, eu estou contenta.
-A profesora que a acompaña, Yolanda, cre que é das mellores que está a competir. Vostede tamén pensa así?
-A ver se hai sorte!
-Tamén nos comentou que están incomunicados totalmente mentres traballan.
-Estamos nun stand, ninguén pode ver aos demais facer o que están facendo, nin nos deixan ter os móbiles con nós, nin á saída a mediodía para comer. Deixámolos e cando acabamos podemos collelos.
-Moi boa maneira de desconectar pero botarao de menos.
-Si, a verdade...
-Sente moita presión?
-A xente agóbiame bastante. Non é que haxa pouca... Vén xente doutros institutos, miran, sacan fotos, comentan... Entre nós os que competimos si que o levamos bastante ben. En Floristería compito con outros rapaces de Madrid, Navarra, Murcia e Cantabria.
-Que tal cos compañeiros rivais?
-Son moi simpáticos, amables e educados... Moi ben!
-É a única galega na sección de Floristería, verdade?
-Si, nela eu represento a Galicia.
-Canto tempo leva cursando no IES San Rosendo de Mondoñedo?
-No instituto levo cinco anos e facendo Floristería dous anos. Bueno, máis ben un porque o ano pasado era máis de xardín e plantar.
-Como se decantou por aprender o oficio da arte floral?
-Vaite sorprender pero a verdade é que non tiña pensado facer Floristería. Ao primeiro pensei que era todo sachar. Pero vin que era unha saída para obter o título da ESO.
-Alguén da súa familia se dedica ao mundo do arte floral?
-Non, de feito non hai ningún xardineiro nin florista na familia.
-Veo xa como un futuro laboral?
-Eu creo que si.
-Se gañase, que vai pasar?
-Hai tres premios: ouro, prata e bronce. Se gañas, podes chegar a ir ao Worldskills [os mundiais], e ir a Abu Dabi e Budapest.
-Mire que nos pode poñer moi alto o pavillón de Mondoñedo...
-Si, xa me podían facer unha estatua se chego aló...
-Coma Cunqueiro...
-(Ri).
-Nunca se sabe, pero ao mellor nos vén cun ouro para a casa. Que sentiría se iso ocorre?
-Primeiro, non mo crería porque é algo inalcanzable.
-Imaxino que estará a recibir unha morea de apoios, da familia, do instituto, dos mindonienses.
-Si, a tope, ata no Facebook.
-Cal é a súa flor favorita?
-A gloriosa.
-Como cre que debe ser alguén que se dedique ao arte floral?
-Primeiro, que lle guste e segundo ser tranquilo. Non sei... ser sensible si, é imprescindible.
-Pois moita sorte Soraia.
-Grazas!
os seus traballos
As probas que tivo que facer Soraia Barbosa no Spainskills foron a creación dun xarrón de estilo barroco acompañando un proxecto de vestido floral de estilo libre co tema «Vestidos de hadas» e un ramo de man.