Este viveirense cociña «con total liberdade» a un paso da súa casa
27 mar 2014 . Actualizado a las 07:00 h.Está a un paso da casa pero noutra provincia. Iso si, facendo o que máis lle gusta na vida: cociñar con liberdade. Diego Gómez Lamelas (Viveiro, 1984) estudou fai 9 anos Hostalería en Santiago aprendendo de gastronomía pero tamén de química, medioambiente, contabilidade... pois ao fin e ao cabo un cociñeiro ten que saber máis alá da cociña. Leva os fogóns de A Sobreposta, no limítrofe O Barqueiro, onde un importante número de mariñáns proban os seus pratos.
-Antes de chegar ao Barqueiro, ¿por onde andivo cociñando?
-Teño traballado fóra, en Asturias, País Vasco, Barcelona... pero quixen vir para aquí. Teño experiencia, que foi importante, en restaurantes de renome pero en vez de quedar en restaurantes gastronómicos con estrelas Michelín prefirín ir máis pola miña conta. Para min, a cociña tradicional é a base e se lle queres meter máis evolución, é outra cousa. Recoméndolles aos rapaces novos que aínda que ven cousas modernas, aparatos... se inculquen das bases da cociña tradicional, é o que move todo.
-¿Séntese a gusto no local?
-Aquí estou máis relaxado aínda que hai moito volume de traballo en temporada alta. Por semana en inverno estou só e nas fins de semana Eva axúdame moito. É un dez(...) Teño un bo xefe (Luismi) e compañeiros (Zarina e Rosana) dos que estou contento, eles de min non tanto [sorri] porque son un pouco pesado, algo maniático. O bo é que aquí teño total liberdade para facer o que queira e iso o valoro moitísimo. É coma se estivera no meu propio negocio aínda que non ao cen por cen. En cociña teño bastante marxe.
-¿Que soen preparar?
-A nosa é cociña tradicional pero o que prima é o xénero. Leva toques modernos como o emplate pero predomina o fresco, igual que no caso do marisco(...) Haberá xente que poda dicir que é caro pero non comparto iso, tratándose de pescada ou rodaballos frescos. Se os fas na casa e os mercas na peixería non o mercas máis barato. Ademais, é complicado manter a liña de traballo, sobre todo en temporada baixa.
-Fala do produto fresco pero tamén hai outros factores fundamentais na cociña como...
-O que marca o ritmo diario é a organización e a limpeza.
-Sen eses dous poderíase dicir que non hai cociña, ¿verdade?
-Verdade. Por iso en ese sentido en A Sobreposta non é que estea tranquilo, estou o seguinte.
-¿Quere engadir algo máis?
-Un agradecemento a meus pais polo seu esforzo comigo.
entre fogones DIEGO GÓMEZ LAMELAS, cociÑEIRO DE A SOBREPOSTA NO BARQUEIRO
Croquetas de mexilón da ría
Ameixas con setas e polbo
Segredo de porco ibérico
Tarta de queixo fresco
Este menú suxerencia está ideado para dous comensais e custa 42 euros en total (bodega aparte)