A Fundación para o Desenvolvemento da Comarca do Baixo Miño vén de publicar no BOP a apertura da convocatoria de axudas dentro do programa de desenvolvemento Rural Proder 2, financiado pola Unión Europea e que xestiona xunto con diferentes organismos públicos e entes locais. Este plan ten como último fin procurar o desenvolvemento das zonas rurais situadas nas zonas máis desfavorecidas da U.E., continuando así co labor da Iniciativa Comunitaria Proder. Ó programa de axudas poden acceder empresarios, sociedades agrarias, cooperativas, Concellos, Mancomunidades, persoas físicas e calquera entidade pública ou privada que teña un proxecto de desenvolvemento para O Baixo Miño. O prazo de solicitude inaugúrase esta semana e permanecerá aberto ata o 1 de novembro do 2006. Nesta segunda edición do Proder participan, ademáis da Fundación Comarcal Baixo Miño, Agader e os concellos de A Guarda, Oia, O Rosal, Tomiño e Tui. O programa achegará á comarca un paquete de axudas cun orzamento de 7.895.237,03 euros e que posibilita a subvención do cen por cento en determinadas actividades non productivas, como pode ser a restauración e aproveitamento de paisaxes ou construccións rurais de interese histórico, turístico e cultural. O límite para actividades productivas é do 40 por cento do investimento total. As persoas que estean interesadas nesta nova liña de axudas comunitarias poderán informarse na sede da Fundación Comarcal do Baixo Miño, situada no número 8 da rúa Foxo, en Tui, na do programa Proder 2, na rúa Colón, 2, ou en calquera dos cinco Concellos da comarca miñota.