O espazo de humor, música e entrevistas que lidera o humorista Roberto Vilar, Land Rober , comezará hoxe a súa segunda temporada envolto en novidades para achegarlle ao público dúas horas de diversión familiar, esta vez estreando horario, o xoves ás 22.00 horas, segundo avanzaron os membros do equipo no acto de presentación deste espazo.
Partindo das liñas mestras do entretemento, o programa continuará coa súa liña de humor, intentando que o público se implique nas parodias que propón a nómina de personaxes do programa. Unha destas pantomimas, Jallejeros Pachanjeros, está inspirada no programa Callejeros e nela un reporteiro segue o día a día dos distintos traballadores do mundo da verbena galega.
Unha das novas propostas do programa afecta ao piso habitual de Land Rober, que muda totalmente de aspecto, xa que os mozos, ávidos de experiencias novas e con máis ganas que nunca de emanciparse, ocuparán unha vivenda en desuso sen que a Garda Civil o saiba.
O público do estudio terá tamén a oportunidade de participar en distintas parodias, no marco dunha velada de Pressing Catch , na que o espectador botará un pulso como regueifeiro contra os púxiles Camión de Boqueixón e a súa muller Chimpín de Abadín .