oma hostaleiro é vital saír da casa, creo que é un paso que ten que dar todo o mundo. Un ten que ser consciente das súas raíces, do lugar de onde parte, pero é necesario ter outra perspectiva, saír, empaparse doutras culturas, doutras formas de funcionar, do que te poden aportar as persoas dos diferentes lugares que visitas, e as experiencias. Pero sen complexos, sen prexuízos. Non hai que esquecerse de onde parte un, de onde se fixo o esforzo porque esa xente poida saír. As raíces danche coñecemento, tradición, identidade. Son a esencia do que es.
O importante de saír é quedarse co positivo da saída e do que tiñas aquí. E que ningún lugar, por moi pequeno que sexa, te fai pequeno. Se volves con todas esas experiencias, calquera proxecto que vaias asumir vai ter máis pouso. Non hai porque acabar nun negocio que funcione igual que os demais. Podo acabar no meu lugar de orixe. Porque teño unha aprendizaxe e, a partir de aí, podo xerar algo que sae de min, que é persoal. Iso é o que lle da sentido ás cousas. Pero para acadar iso hai que liberarse de certos prexuízos, como o de que as raíces te reducen. O pequeno, o local non te vai reducir.
É importante a nosa identidade, é o noso esquelete para poder medrar. Porque a veces andamos como a bandazos e un non sabe quen é. Pero as raíces vante cravar sempre nun sitio cando máis o precises, vante facer agarrarte ao positivo. A hostalería ten moito diso. Ti vas a un destino e queres empaparte da cultura, das xentes, de todo o que transmite un destino con esencia e personalidade. ¿E como se transmite iso? Se o vives, se o sentes. Iso permite que o turismo non funcione como termitas que esgotan todos os destinos, O turismo empeza porque os que viven todo o ano estean orgullosos e inviten a vir cada día do ano. E iso só se fai sendo conscientes de que virtudes ten o lugar no que vives. E isto só se ve se viaxas, se tes perspectiva. Por iso é vital que os futuros hostaleiros saian e percorran mundo. É unha fonte de inspiración. Pero tamén me gustaría recordarlles que despois hai que voltar, porque Galicia os necesita. Deben saír e formarse, pero tamén deben voltar porque esta é unha terra máxica. E onde está a maxia están os soños.