Rubén Veloso Carnero: «Queremos que todo saia á luz» 

Os alumnos deste mestre de Verín son os protagonistas dun programa pioneiro fronte ao acoso escolar


ourense / la voz

Estudou Musicoloxía en Oviedo e exerce como profesor de Música no instituto verinés Taboada Chivite, aínda que as súas raíces están en Xinzo de Limia, onde naceu en 1979. Rubén Veloso Carnero e o seu compañeiro Aníbal Barreira Rodríguez coordinan o proxecto Titorías entre Iguais (TEI), que busca a prevención do acoso escolar.

-¿Como está sendo esta primeira etapa?

-O día 5 foi a adxudicación de parellas de alumnos cun titor de 3º ou 4º da ESO e un titorando, de 1º, que forman un equipo entre eles para que desde o primeirísimo momento se poidan coñecer posibles situacións de acoso ou xermes desas situacións. É máis fácil que un rapaz se confíe a un compañeiro que a un adulto. A primeira impresión, de momento, é todo moi positivo, aínda que xurdiron dúbidas.

-¿Que lles preocupa?

-Algún veu dicindo que o molesta un alumno pero, como é veciño do titor, ten medo que non arranxe o problema. Esas dúbidas o que che fan ver é que os rapaces están involucrados e que o están tomando en serio. Entre eles xa están resolvendo problemas. Graves non teñen xurdido. A nós chegarannos cando non o dean resolto eles sós.

-¿Percíbense cambios no conxunto do centro?

-Realmente isto comezou fai xa un par de anos, cando desde o equipo directivo empezamos a pensar como mellorar o clima, que non é malo, pero sempre se pode mellorar. Temos moitos alumnos inmigrantes e de etnia xitana, a crise aquí pegou duro... Pensamos como mellorar o clima para que, mellorando o clima, melloren tamén os resultados académicos. Vimos o programa TEI e fixemos un curso de formación.

-¿Hai implicación?

-O equipo TEI somos 13 profesores implicados en facer as tarefas, como unha titoría todos os luns para traballar cos alumnos, pero o programa foi aceptado polo 100% do claustro. Temos a sorte de ter un claustro moi implicado nestes temas e iso é importante porque, se non se cre nel, isto non funciona.

-¿Participan centros doutros niveis educativos?

-O colexio Princesa de España ten tamén TEI, comezamos isto xuntos. Eles teñen moitos alumnos xitanos, que despois pasan ao instituto. Unha vez ao trimestre temos unha reunión con eles e co colexio Amaro Refojo, que esperamos que tamén se apunte ao programa. O alcalde comprometeuse a ter unha reunión con todos os centros, públicos e privados, para favorecer que participen porque é máis fácil traballar con eles desde primaria, que cheguen ao instituto xa cunha dinámica.

-¿Hai problemas entre etnias?

-Problemas de convivencia non hai, non hai unha distinción entre os comportamentos de uns e outros. O problema que hai cos xitanos é o absentismo, aínda que aquí está bastante atenuado grazas a Asuntos Sociais, Pensabamos ter problemas co TEI por mesturar paios e xitanos pero non houbo ningún problema, ningún.

-¿Cales son as claves do TEI?

-Que a solución é por parte dos alumnos, e tamén a responsabilidade. Agora hai moita sobreprotección e esta é a primeira vez que a algúns alumnos se lles dá unha responsabilidade. Así séntense parte do centro e así, agora, non vale mirar cara á outro lado. O dos espectadores que se fala nos casos de acoso xa non vale, agora todos son protagonistas e responsables. Sexa ou non o teu titorando, tes que ir alí se ves que alguén está chorando, por exemplo, ou tes que avisar ao seu titor. Establécese unha rede que non deixa que pase nada.

-Soa optimista.

-Creo que imos conseguir outra maneira de resolver os conflitos, co diálogo e entre os alumnos. Non tapar as cousas é importante, queremos que todo saia á luz. O titor ten que buscar a verdade cando recibe a queixa do seu titorando, pero o importante é resolver os problemas falando.

-Saben escoitar?

-Igual que aos adultos, cústalles. Hai que ensinarlles, nunca a nós nos ensinaron estas cousas, pero cousas como empatía, escoitar... unha vez que llo explicas, fano moito antes que os adultos. Para eles, pórse na pel do seu compañeiro é fácil; a un profe cústalle máis entender como se sente un rapaz se, por exemplo, lle collen un bolígrafo.

TEI. O programa Titoría entre Iguais busca a complicidade e a protección entre os alumnos para detectar actitudes que poidan derivar en acoso no futuro. Cada alumno menor ten un titor de máis idade. Os conflitos deben resolverse entre eles.

Conoce nuestra newsletter con toda la actualidad de Ourense

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
2 votos
Comentarios

Rubén Veloso Carnero: «Queremos que todo saia á luz»