O Pazo provincial non é un castelo feudal


Transcorreron dez días dende que coñecéramos a denuncia dunha muller ao presidente da Deputación de Ourense, por presuntamente ofrecer traballo a cambio de sexo. Durante este tempo vimos ao presidente da Xunta axeonllarse ante o barón ourensán para darlle con actitudes machistas a volta á tortilla, convertendo á vítima en verdugo, transformándoa nunha especie de demo que tentou apoderarse do bo de Baltar que finalmente, como se se sometera a un exorcismo, se libraba do mal para voltar a ter esa «alma pura» que todos coñecemos. Un Feijoo que, ante o trompazo que se pronostica que vai a sofrir o PP nas próximas eleccións xerais, necesita máis que nunca ter uns bos resultados para asegurarse un billete de ida a Madrid, e que se esperta dende hai uns días amedrentado pola posibilidade de que, como ocorrese no 2004, o baltarismo volva a amotinarse nun piso ou a lanzarlle calquera tipo de pulso que lle torza ao de Os Peares o desembarco na capital.

Baixo o paraugas da dirección autonómica do seu partido e coa dirección nacional mirando cara outro lado, resisten empuñando as armas da prepotencia e dos golpes no peito Baltar e os seus. Este martes ausentábanse do pleno convocado no Pazo Provincial para reprobar ao presidente, xustificando a súa non asistencia ao mesmo cun escrito no que calificaban a actitude da oposición como «unha miserable, ruín e rastreira pantonimia política», e de «tentar gañar votos con nauseabundas artimañas», insultos que ían acompañados dun vídeo que o propio Baltar colgaba nas redes sociais para mostrarnos que á mesma hora á que estaba citado para rendir contas, el inventara un acto de escapismo en Vilamarín. Unha actitude coa que non soamente amosa unha cobardía sen precedentes, senón un desprezo absoluto á institución que preside, e a todos os ourensáns e ourensás. A estas alturas, alguén debería recordarlle que en Ourense non hai vasallos, senón cidadáns, e que él é o presidente no Pazo Provincial, non o señor dun castelo feudal. Non podo imaxinar un esperpento destas dimensións en calquer país da nosa contorna, onde nos últimos anos temos visto dimitir a mandatarios por copiar un parágrafo dunha tese doutoral. Debe ser porque Ourense segue sendo un sitio distinto.

Conoce nuestra newsletter con toda la actualidad de Ourense

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
7 votos
Comentarios

O Pazo provincial non é un castelo feudal