«Non sei cal era o programa da viaxe, pero non están os tempos para derrochar diñeiro público»
OURENSE
Marta Arribas decidiu abandonar a súa responsabilidade como concelleira de Termalismo aínda que mantén as delegacións de Igualdade, Xuventude e Voluntariado. As discrepancias co tenente de alcalde, Alexandre Sánchez Vidal, eran evidentes. O luns comunicou a súa decisión persoalmente ao alcalde minutos despois de anunciar a súa decisión aos compañeiros do grupo do BNG.
-¿Por que tomou a decisión de dimitir?
-Son pasos persoais que se toman despois dunha reflexión grande. Non son decisión que se toman a lixeira. Penso que é o mellor para min como persoa pero tamén para o grupo municipal que represento. Non quero prexudicar a ninguén.
-¿Era imprescindible dada a situación que vostede estaba vivindo dentro do grupo municipal?
-Eu non utilizaría a palabra imprescindible. Non quero facer disto unha causa fóra do común.
-¿Foi o detonante que vostede non fose a viaxe destes días?
-En absoluto. Quen me coñeza sabe que non son unha persoa caprichosa. Pola contra, sempre quixen permanecer nun plano discreto sen prexudicar a ninguén. Eu podo viaxar a Baden Baden sola ou con quen sexa cando o considere oportuno.
-¿Son malas as relacións no grupo do BNG?
-Como en calquera grupo ou familia hai diferenzas, pero sempre chegamos a acordos e non ten pasado nada.
-¿Queda aberta unha ferida no grupo do BNG?
-Non hai que velo así. Hai que velo como unha decisión persoal dunha concelleira que vai a seguir sendo fiel ao seu traballo, a institución á que representa e aos cidadáns.
-¿Era necesario gastar 19.500 euros na viaxe para ver balnearios?
-Non o podo dicir porque non sei cal era o programa da viaxe, pero non creo que se derrocharan os cartos. Non están os tempos para derrochar diñeiro público. Me consta que os compañeiros non fixeron ningún derroche.
-¿Seguirá mantendo a disciplina do BNG e os pactos de goberno?
-Iso de disciplina xa é unha palabra que na actualidade non me gusta utilizar nin a título persoal. Eu serei fiel ós cidadáns de Ourense porque son unha concelleira electa.
-O tenente de alcalde, Alexandre Sánchez Vidal é un lastre para o BNG nestes momentos?
-Non creo que sexa un lastre, nin moito menos. O tenente de alcalde, igual que o alcalde ou o resto de concelleiros fan o que eles estiman que é o correcto. Estamos nun goberno bipartito que pretende xestionar os intereses da cidade de Ourense.