En todas as grandes catástrofes xa sexan de orixe natural ou provocadas polo ser humano, sempre hai alguén que se beneficia economicamente.
Na actual pandemia algunhas compañías farmacéuticas conseguiron sacar ao mercado o único que pode frear ao virus. E, por outra banda, os traballadores da sanidade pública arriscaron vida e saúde na súa loita contra a enfermidade. Estes últimos recibiron por parte da sociedade gratitude e admiración. As empresas farmacéuticas, ademais, van recibir cuantiosos beneficios, dos que participarán, supoño, os equipos de científicos que fixeron posible o que parecía imposible: unha vacina nun ano.
Tamén obtiveron beneficios económicos os que fabrican máscaras, xiringas, aparellos respiratorios e traxes protectores. Fixeron un esforzo para aumentar a produción e paliaron así a imprevisión dos gobernos.
Os albaneis, electricistas, fontaneiros, carpinteiros e pintores incrementaron traballo e beneficio. Están desbordados polas peticións de particulares. Parece ser que o que non se gasta en roupa e viaxes a xente dedícao a mellorar a vivenda. A eles hai que engadir os informáticos. As empresas e o comercio teñen que remodelarse e necesitan expertos na nova realidade online. Ah! E os fabricantes de papel hixiénico, están gratamente sorprendidos pola demanda dos seus produtos. Os máis prexudicados foron os negocios do lecer, o turismo e a hostalería, pero é posible que, se conseguen resistir, se produza unha recuperación en uve cando todos esteamos vacinados e nos lancemos a gozar do que nos faltou: viaxes, bares, restaurantes, copas nocturnas, reunións de familias e amigos E a Cultura? A Cultura oxalá non empeore…