«Democracia? Si, grazas»


Despois da pandemia, que? O comunismo na estela dun confinamento que representa a «arela totalitaria máis brutal feita realidade», como predicía Zizek? O autoritarismo iliberal ou «coronaditadura» do que falaba Sloterdijk? Pois non: despois da pandemia, democracia. Os expertos, vilipendiados na crise financeira, volven ser referencia para a adopción das decisións públicas, pese ás súas tan científicas dúbidas. Merkel e a Unión Europea, antonte fonte dos sufrimentos da poboación do sur europeo, volven ser referencia solidaria e o espazo protector nunha comunidade internacional xaxún de referencias hexemónicas. E a confianza nas institucións, cuestionada polos populismos, recupérase grazas a burocracias de calidade (como o Sergas) e a Gobernos competentes (coma o galego). Ata os liderados persoais trunfan na mesma sociedade que derruba estatuas de vellos persoeiros.

Despois do confinamento, votamos. Recuperamos ás forzas políticas tradicionais e preterimos aos neopopulistas de ambos os dous extremos. Votamos polos partidos máis profesionais na campaña, aínda que fose, coma no caso do BNG, agochando as esencias e agarimando as continxentes aparencias. Votamos aos que máis falaron con ilusión dun futuro de pactos, e non aos que insistiron na confrontación divisoria.

Catro maiorías absolutas nos tempos da crise financeira e a pandemia son excepcionais. Poucas persoas poden lucir semellante medalleiro na solapa. Gañou Feijoo, e o PPdeG. E tamén Galicia: porque demostrou que a democracia é o sistema que mellor responde ás preferencias da cidadanía. Porque votar non é perigoso: é esencial. E porque democraticamente os galegos lexitimamos a quen terá que afrontar desde a Xunta a peor crise sanitaria, económica e social que recorde calquera persoa viva. Agora, a traballar. Todos, con independencia de como lle fose nas urnas.

Por Pedro Puy Portavoz do PPdeG no Parlamento de Galicia

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

«Democracia? Si, grazas»