Australia non está tan lonxe


Seica o vemos na televisión todos estes días e dende fai meses estamos a pensar que iso está moi lonxe e aquí non vai pasar nada semellante. Imos facer un pouquiño de memoria, soamente ata o 2017. Lembrádesvos dos mortos dos incendios de Portugal? Dos miles de hectáreas arrasadas polos lumes no pais veciño? Lembrádesvos do cheiro a fume? Lembrádesvos de todas as voces que dixeron que iso non ía a pasar en Galicia? E pasou. Non había ningún motivo polo que non puidera pasar. De onde sae esa soberbia que nos fai pensar que estamos a salvo? Que calquera aldea do rural está a salvo? Acaso estamos facendo o posible para que aquilo non se repita ou seguimos refuxiándonos na estúpida idea de que isto a nós non nos pasa. Non temos memoria. Galicia ten aproximadamente 2,95 millóns de hectáreas... En Australia levan máis de 10 millóns arrasadas polos lumes e non parece que vaia a parar axiña. As cantidades marean. Pensade que cada vez chove menos, neva menos, o verán chega ata outubro ou máis, os incendios son cada vez máis grandes e perigosos. Imos facer algo ou seguimos esperando a que o fagan por nós? Pero, esperade un momentiño: quen o vai facer por nós? A Administración, sexa cal sexa? Pero é que estamos a falar dos nosos montes, das nosas fincas, dos camiños que sempre utilizamos e que agora ninguén limpa. Estamos a falar desa manía que temos de plantar os pinos ata a cortiña da porta por iso de que algo darán. Estamos a falar de tirar os plásticos dos silos no medio do monte onde ninguén os vexa (si que se ven) ou o lado da casa, ou a neveira vella polo barranco do rego. Hai un vídeo que circula por Internet e se titula Quitáronnos o verde pero non a ilusión. E moi bo para os que non teñen memoria. Nalgún momento imos ter que poñernos as pilas, xa non hai tempo que perder. Ou seguimos esperando e así, logo, teremos un motivo para queixarnos (e chorar). Ese vitimismo tamén ten seu aquel.

Por Isabel Calvete Axente forestal en Os Ancares

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
13 votos
Comentarios

Australia non está tan lonxe