Controlar as bancadas


Non hai semana que non nos traia a nova dunha pelexa nun campo de fútbol ou de insultos cargados de machismo, homofobia ou racismo, cuspidos dende as bancadas coma un vómito perverso. As máis das veces o conflito xorde entre afeccionados rivais que atopan no fútbol o escenario perfecto para as agresións físicas e verbais. Non hai máis que achegarse a unha instalación deportiva, con independencia da categoría, para vermos pais berrar coma energúmenos, coma se a vida lles fose no partido. É certo que cando alguén, non contento co resultado, consegue agredir algún árbitro que frustra a vitoria do seu equipo, o feito adoita traer consecuencias, mesmo penais, como é normal. Pero suspender un partido por lle chamar nazi a un xogador ucraíno do Albacete que seica comulga co ideario fascista de grupos paramilitares non ten precedentes. E claro, axiña xorden as comparanzas con outros casos de violencia verbal nos campos como cando lles chamaron mono a Samuel Eto’o, maricón a Michel ou lle tiraron un plátano a Dani Alves no intre en que ía botar un saque de esquina. Son soadas tamén as animaladas que teñen que aturar as colexiadas e nalgunha ocasión mesmo vemos como algúns afeccionados aplauden a un presunto agresor machista sen que pase nada. Vaia por diante que rexeito toda a violencia que poida haber nun terreo de xogo. Con todo, quero ver a vara de medir a partir de agora, porque todos sabemos que algúns medios de comunicación e unha parte da sociedade teñen normalizado o machismo, o racismo ou a homofobia, que son precisamente as trabes sobre as que se asenta ese nazismo que temos que combater se queremos controlar as bancadas e defender a dignidade das persoas agredidas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
19 votos
Comentarios

Controlar as bancadas