Pechando a etapa Feijoo


O panorama político mudou notablemente. A dereita cría que tiña garantido o control político das institucións durante tempo e que non había alternativa de esquerdas con posibilidade de goberno. Os socialistas, con Pedro Sánchez á cabeza, rachamos ese escenario político, recuperamos a iniciativa e acadamos maior apoio social e posibilidades electorais. E cando haxa eleccións, os socialistas volveremos ser a primeira forza na política española.

Para a dereita o goberno era un elemento fundamental á hora de manter a súa fortaleza, e sen goberno a dereita está desnortada e ensaiando se a solución interna e o referente que propón será permanente ou puramente transitoria. Porque se a Rajoy houbo que retiralo por non asumir a importancia da sentenza da Gürtel, non hai evidencias de que o PP entendera a mensaxe e a importancia da rexeneración e exemplaridade. A volta á dereita máis dura non é un camiño de futuro.

Os socialistas pechamos a etapa de Rajoy en España, e agora pecharemos a etapa de Feijoo en Galicia. Despois de tres maiorías consecutivas, a Galicia que nos deixa Feijoo non vai a mellor. A falla de proxecto para o país, a carencia de política económica, a desfeita das políticas sociais ou o abandono do rural amosan un país cun fondo problema demográfico e con menos posibilidades de futuro. Feijoo nin tivo proxecto nin foi un gran xestor, e foi cómplice dos gobernos de Rajoy. A Galicia non lle foi ben cos gobernos da dereita, que non investían o presupostado, que aplicaron o copagamento farmacéutico, que dicían que era imprescindible conxelar as pensións. Unha dereita cínica que se atreve a abrir a boca agora, cando calou mentres gobernaba.

Pero Feijoo é un político espido, a quen a través do poder lle conseguiron facer un traxe. Pero ese traxe de bo xestor é unha creación ficticia. E agora empézase a detectar o que non hai, así como o que falta. Por iso vaise abrindo unha nova etapa na política galega, na que os socialistas imos amosar o noso compromiso con Galicia e con cada un dos nosos concellos. Porque, alí onde gobernamos, os nosos alcaldes e alcaldesas son de referencia, e onde non o facemos non aparecen políticas municipais capaces e efectivas.

A política de Feijoo ten un forte déficit nas cidades galegas, e tense esquecido da revitalización da Galicia interior e do medio rural. E cada vez somos máis os galegos e as galegas que o sabemos e o queremos cambiar. Co impulso e a forza revitalizada da esquerda estamos en condicións de pechar a etapa da dereita en Galicia como o fixemos en España.

Por Gonzalo Caballero Secretario Xeral do PSdeG-PSOE

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
14 votos
Comentarios

Pechando a etapa Feijoo