Libros en São Paulo


Aliña de metro da avenida Paulista comeza na estación Paraíso e remata en Consolação. Os habitantes da cidade, o gran centro financeiro e industrial do país, con case 20 millóns de habitantes, a segunda poboación da América Latina, despois de México DF, fan brincadeiras e parábolas co caso, tanto para falar do amor como para falar da situación económica, que hai algúns anos anunciaban os discursos oficiais con expectativas case que paradisíacas e anda agora en tempos de devalo e confusión. Os xornais falan de creba técnica da economía nacional. Mais en calquera caso, a cidade está chea de vida e as librerías cheas de xente, igual que en Buenos Aires. E de xente nova, que é o que máis esperanza dá. Aquí están algúns dos meirandes establecementos libreiros da América Latina, cos seareiros a ler nas cadeiras, sentados no chan ou arrimados ás paredes. Se cadra non poden mercar, pero len. Ven de rematar a Feira do Libro de Guadalajara (México) con algunhas cifras importantes. Malia os catastrofistas e os apocalípticos, o libro (a lectura) segue vivo, e o fetichismo das pantallas non o vai arrombar doadamente. Iso din as cifras. Nos Estados Unidos a caída da facturación do libro electrónico no que vai de ano anda nun 20 %, mentres que o consumo accesible en papel (libros de peto) sube un 9 % respecto do ano anterior. Agardemos os resultados do noso Culturgal (Pontevedra), que está hoxe en plena actividade.

Viñemos a São Paulo, na parcería dos amigos da Ponte Atlántica, a presentar os primeiros títulos de Mar Maior, este pulo noso por proxectar o discurso da cultura galega alén das nosas fronteiras, mesmo noutras linguas próximas. E aquí estaba a nosa xente, o lobby dos galegos e as galegas no mundo: a Galicia exterior que, malia todo, existe. E unha vez máis, como en México, como en Buenos Aires, batín cos lectores novos, coa mocidade que segue a ver nos libros (na lectura) a grande fiestra que nos abre á experiencia da vida. E coñecín a Eduardo Lages, un mozote de vinte e poucos anos, que vén de autopublicar unha novela, Querido Jaime, na que conta a aventura dun ancián de 72 anos que vive só, un día sae da casa e pérdese na gran cidade.

A novela (110 páxinas) está dedicada ao seu pai, «que me protegeu e nutriu por máis de 20 anos», pero o que máis me interesou foi a fórmula editorial, a estratexia de marketing e o modelo de negocio. Leva a máquina de escribir xunto cos libros, editados por el mesmo, enriba dunha bicicleta, cun letreiro no que oferta ao mundo a súa produción. Só lle falta asubiar, coma os nosos afiadores-paragüeiros de Nogueira de Ramuín. Detén a bicicleta na beirarrúa, ás veces próximo ás grandes librerías, e coma quen xestiona un mostrador ambulante despacha os libros, conversa cos clientes e, entre parola e parola, avanza no capítulo da seguinte novela, que seica xa vai moi adiantada. Escribe nunha Hermes Baby portátil. «¿E non usas computadora?», pregúntolle. «Iso na casa. Aquí resultaría demasiado arriscado».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
16 votos

Libros en São Paulo