O mes pasado comentabamos que unha moza foi violada por cinco individuos durante as festas de San Fermín. Agora o feito repítese en Palma de Mallorca, onde cinco franceses agrediron a unha turista.
Semella que os machos con instintos violadores buscan o apoio dos seus iguais para realizar a fechoría.
Non sabemos a que se dedican os franceses autores da violación de Mallorca, pero si trascendeu que un dos agresores de Pamplona é garda civil. Imaxinen o trato que tal individuo daría aos que caesen baixo o seu poder. Din que apartárono do servizo, confiemos en que para sempre.
Á parte dun castigo exemplar, creo que só a colaboración cidadá pode erradicar esa praga das violacións.
No caso de Mallorca, a moza estaba nunha discoteca, con amigos. Os franceses acosárona, ela non lles fixo caso, entón un colleuna por detrás, levantouna no alto e os outros catro metéronlle os dedos na vagina, ademáis de darlle unha puñada na cara.
Que facían namentres os amigos da moza e o resto dos presentes na discoteca?
As mulleres foron durante séculos meros obxectos sen ningún dereito. E hoxe aínda a violación, igual que as malleiras, son parte da normalidade.
Lembren á pobre muller que lle dixo ao xuíz que o seu marido pegáballe «o normal», e que na Unión Europea aínda hai países que non consideran delito a violación matrimonial.
Para cambiar as cousas hai que sumar ás leis os costumes, e eses cambiámolos entre todos.