Zapatero pide un aplazamiento de su declaración por la «complejidad» del sumario
HAI situacións que poden ser legais, pero que non poderán nunca ser xustas. Vexo na prensa que a Xunta está estudiando a legalización da prostitución, mellor dito, está buscando «o consenso político e social» para dar un paso que xa deron en Cataluña e no Concello de Bilbao. Trátase de dar cobertura legal a unha situación de escravitude que só beneficia ós propietarios de locais de alterne. Hai temas nos que non hai que buscar o «consenso social e político», porque a xente non está concienciada do problema e resulta fácil de manipular. O que hai que buscar é información entre os que levan anos traballando no tema e arriscando nel o seu prestixio e ata a súa integridade persoal. En Galicia hai institucións e organizacións que levan anos axudando ás mulleres marxinadas de todo tipo e loitando contra esa lacra social que son os locais de alterne. Colectivos como Figa, Alecrín ou as monxas oblatas, moi distintos ideoloxicamente, pero que teñen en común a defensa das mulleres marxinadas e moi especialmente, no caso das monxas e de Alecrín, das prostitutas.Hai xente de boa vontade que pon a Holanda como exemplo das vantaxes da legalización, cando o feito certo é que alí están cuestionando o acerto de tal decisión, xa que teñen comprobado que aumentou de forma chamativa o número de prostitutas menores de idade e que o control sobre os locais é moi difícil.Paréceme lamentable a actitude de certos intelectuais progresistas que pensan que loitar contra a legalización equivale a estar en contra das prostitutas e a favor da represión sexual. É unha postura frívola e cómoda: se descoñecen o asunto, mellor estarían calados que defendendo a explotación legal de seres humanos.Nas novelas policíacas o investigador pregúntase ¿quen sae beneficiado co crime? Neste tema ben pode facerse a mesma pregunta. A resposta é: Os empresarios dos locais de alterne.Señoras e señores da Xunta, por favor, non fagamos política con este asunto e non colaboremos á implantación dunha legalidade infame.