Samaín en Antas de Ulla como escusa para aprender galego e a historia do Camiño de Santiago
ANTAS DE ULLA
Os alumnos do colexio participan nun proxecto que une a educación e as festas tradicionais galegas
03 nov 2021 . Actualizado a las 16:19 h.A vontade dun profesorado activo e implicado máis alá do currículo e a dun grupo de rapaces con ganas de aprender e ademais de pasalo ben fan unha mestura que pode ter efectos positivos na aprendizaxe dos alumnos.
Unha boa mostra púidose comprobar este venres cando o alumnado e o profesorado do CEIP Plurilingüe de Antas de Ulla levaron a cabo o seu particular Camiño de Santiago «terrorífico» con motivo da festa de Samaín. Todo o centro aderezouse para presentar un espazo lúgubre, tenebroso e misterioso polo que se desenvolveron os alumnos en diferentes representacións. Mentres escoitaron un conto arrepiante foron atopando seres terribles e pavorosos no seu camiño a Compostela, como a Santa Compaña e a procesión de ánimas das que se fala nas lendas galegas.
Esta iniciativa tan lucida e festiva forma parte dun proxecto que acaba de poñer en marcha o colexio para que os alumnos traballen sobre a idea do Camiño de Santiago, así como para aprender lingua galega, e ademais de desenvolver destrezas relacionadas coas artes plásticas. Os rapaces crearon un tramo do Camiño Francés, entre Antas de Ulla, Monterroso e Palas de Rei, e que percorreron os nenos e nenas dos diferentes cursos con motivo do Samaín.
Deste xeito, pasaron polo cruceiro de Lameiros, o albergue de Ligonde, por un cemiterio de peregrinos, por un hospital de peregrinos ou por unha igrexa do Camiño. No traxecto fóronse atopando coa Santa Compaña e coas ánimas, que interpretaron os profesores do colexio. Os cativos acudiron disfrazados de diferentes personaxes terroríficos que se poden atopar no Camiño. Durante este terrorífico traxecto, unha alocución foilles contando aos alumnos as particularidades da ruta Xacobea e da Santa Compaña.
O proxecto tamén pretende traballar a lingua galega a través de todo o percorrido con frases ao longo do tramo da ruta a Santiago, nas que se pode ler, por exemplo «Así chove no Camiño'». Tamén na alocución se falouse de escritores e persoeiros da cultura galega. Esta iniciativa do colexio de Antas pretende ter continuidade nas seguintes celebracións que faga o centro, sempre coa temática da lingua e o Camiño de Santiago como protagonistas.