Aproveita os 40 anos da edición da obra «Das cousas de Ramón Lamote» e que supuxo para as letras galegas o primeiro Premio Nacional de Literatura
06 oct 2025 . Actualizado a las 14:59 h.A Real Academia Galega (RAG) réndelle unha homenaxe a Paco Martín en Lugo coindindo cos corenta anos da publicación de «Das cousas de Ramón Lamote». A cita será o mércores 15 de outubro, ás 17.30 horas, no Círculo das Artes, «nun acto dedicado ao escritor que simboliza o emerxer da vizosa literatura infantil e xuvenil galega, e que lle deu por primeira vez ao galego un Premio Nacional de Literatura», sinala nun comunicado a RAG.
O encontro, de entrada libre ata completar a capacidade da sala, contará coa participación do propio Paco Martín, Isabel Soto, Lois Pérez, Alejandro Tobar e Branca Villares na parte musical
Lamote, Ramón Lamote Miñato, profesor particular de chairego e debuxante de soños por encarga, deulles ás letras galegas o seu primeiro Premio Nacional de Literatura «e simbolizou ademais o emerxer da vizosa literatura infantil e xuvenil en lingua galega».
«Con este acto, a RAG recoñece as achegas de Paco Martín á literatura infantil e xuvenil galega, as súas contribucións a situala como parte da Literatura, con maiúsculas, e en ningún modo menor», salienta a directora da Sección de Literatura da Academia e coordinadora do encontro, a académica Marilar Aleixandre.
O programa do acto
O programa arrincará cunha conversa entre Paco Martín e a tradutora e crítica literaria Isabel Soto, cunha parte final que se abrirá ás preguntas do público. Deseguido o escritor Lois Pérez tomará a palabra cunha intervención titulada De cando o señor Lamote argallou un escritor chamado Paco Martín.
Haberá tamén tempo para afondar no Paco Martín lector, da man do tradutor Alejandro Tobar, que falará dos libros que o unen con el. A parte musical correrá a cargo de Branca Villares.
A RAG organiza a homenaxe a Paco Martín coa colaboración da Deputación de Lugo, a Xunta de Galicia, o Ministerio de Ciencia, Innovación e Universidades e o Círculo das Artes de Lugo. A entrada é libre ata completar a capacidade da sala. Todas as intervencións poderán seguirse ademais en directo dende a páxina web da RAG, academia.gal.