A institución adáptase á nova normativa covid e amplía aforo
06 jun 2021 . Actualizado a las 20:04 h.A Deputación de Lugo continúa co programa Actívate e adáptase á nova normativa sanitaria cun aumento de prazas para todas as actividades. Todas as propostas realizadas ao aire libre contan, dende esta fin de semana, con 15 prazas, 7 máis que ata o de agora. Actívate é unha iniciativa da Deputación para promover o turismo activo, científico e mindfulness nos concellos da provincia, favorecendo deste xeito a recuperación do turismo, da hostalería e do comercio despois do impacto da pandemia.
O sábado, hai dous días, realizouse na Serra do Xistral a única actividade nocturna do programa, Os incribles ceos do Xistral, que permitiu dar a coñecer os estrelados ceos deste espazo natural. Onte, domingo, o Castro de Viladonga acolleu unha proposta para descubrir este espazo histórico, Aventura no Castro de Viladonga. Estas actividades, que arrancaron en maio, levaranse a cabo todas as fins de semana deste mes xuño.
Prazas esgotadas
Ata o de agora, as iniciativas tiveron unha gran acollida e esgotaron as prazas nas primeiras xornadas tras a apertura de inscrición. As persoas interesadas en participar nas próximas iniciativas deste programa poden inscribirse na páxina web http://inscricions.deputacionlugo.org/gl/tema/activate. Para máis información poden chamar ao teléfono 982 260 011 ou enviar un correo electrónico a atuaprovincia@deputacionlugo.org.
Medidas
O programa Actívate forma parte das medidas contempladas para impulsar economicamente a provincia pola crise do coronavirus e súmase a outras iniciativas como «Coñece a túa provincia», que pretende fomentar o turismo; os Bonos Impulso, que permiten optar a descontos en establecementos comerciais de Lugo; «Saborea a túa provincia», que consiste en xornadas gastronómicas e Lugo Termal, con bonos para gozar de descontos nos balnearios.
Convocatoria
A Deputación de Lugo xa abriu o prazo de presentación de candidaturas para a segunda edición dos premios á hostalería e ao turismo da provincia, os galardóns ‘Lugo Cambia ao turismo lucense e ...E para comer, Lugo á gastronomía lucense’. O BOP publicou a pasada semana as bases da convocatoria. As candidaturas poden presentarse ata o 2 de xullo e, como novidade, pódese facer a título individual ou por unha terceira persoa co consentimento expreso do candidato ou candidata, tal e como se solicitou no Consello Provincial de Turismo.
A proposta pode ser presentada por persoas físicas ou xurídicas, institucións e entidades públicas ou privadas, asociacións e colectivos sen ánimo de lucro que teñan repercusión positiva no turismo e na gastronomía a nivel provincial ou nunha zona específica.
Os premios serán entregados nun acto público, sempre que a situación sanitaria o permita, o vindeiro 27 de setembro, coincidindo co Día Internacional do Turismo. Os galardóns pretenden poñer en valor o sector turístico.