A Volta do Agro celebra o 25 aniversario «nos escenarios que temos abertos: as redes»

O colectivo cultural leva desde 1995 recollendo pezas tradicionais galegas polas aldeas, dándolles vida nas actuacións e divulgándoas nas clases


Lugo / La Voz

A crise sanitaria pillou á asociación lucense de cultura tradicional A Volta do Agro en plena celebración. Mañá cúmprense 25 anos da súa primeira actuación, aló polo 1 de maio de 1995, na Festa da Filloa de Muimenta, e os plans de celebración tiveron que mudar e adiarse: «A festa é nos escenarios que temos abertos hoxe en día: as redes sociais», explica Senén Montero, presidente do colectivo. Deste xeito, ao longo destes días están lembrando, mediante material audiovisual, antigo e actual, a historia da agrupación, estreitamente ligada á cultura tradicional galega. «O noso obxectivo foi desde o primeiro momento dignificar a cultura tradicional e recuperar os cantos e bailes que temos», explica Montero.

Primeira actuación de A Volta do Agro, o 1 de maio de 1995, na Festa da Filloa de Muimenta
Primeira actuación de A Volta do Agro, o 1 de maio de 1995, na Festa da Filloa de Muimenta

O traballo de A Volta do Agro estrutúrase en tres áreas: recolleita de pezas tradicionais de canto, baile e música, polas aldeas galegas; transmisión de todo ese legado nas actuacións do grupo; e tamén divulgación nos obradoiros, polos que pasan anualmente cerca de noventa alumnos e que imparten na sede da asociación, na Rúa Paxariños.

A festa de aniversario prevista inicialmente terá que esperar. Pensaban celebrar ao longo de todo este ano cursos monográficos, con músicos e bailadores convidados, facer foliada e un gran festival de escenario con artistas convidados e toda a xente que pasou pola asociación, «pero as circunstancias nas que nos atopamos fan que teñamos que conformarnos con desexar que toda a familia volteira estea ben e que poidamos saír disto e volver á normalidade para poder festexar ao longo de todos os anos que nos quedan de música e baile», continúa Montero.

O grupo, integrado actualmente por unhas 25 persoas, caracterízase por «unificar os grupos de gaitas, baile e pandereteiras e pandereteiros, cunha personalidade propia», matiza Montero. Explica que nos últimos anos empézase a valorar máis a cultura tradicional: «Vivimos unha época moi boa en canto a foliada e a seráns, que levan esa música e esa cultura á rúa». Nestes tempos de incerteza nos que aínda non saben cando volverán a tocar, lembran con especial cariño aquela primeira actuación en Muimenta, pero tamén as que fixeron con frecuencia por diferentes lugares de Portugal, e as festas de San Froilán, «na casa».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

A Volta do Agro celebra o 25 aniversario «nos escenarios que temos abertos: as redes»