Os dous primeiros clasificados do Grupo 1 na pasada Liga da División de Honra pechaban o sábado a primeira volta da presente campaña moi lonxe das expectativas neles postas, pero con visos de rectificar para selar con éxito os seus respectivos obxectivos.
Establecimientos Otero e Liceo Casino asinaban sendas vitorias balsámicas. No caso do conxunto cambadés, encadeando dous triunfos que o reenganchan á pelexa por disputar un ano máis a fase de ascenso á Superdivisión. Co seu 4-2 sobre o frouxo Arteal Santiago, os de Ñajo Padín sitúanse na metade da táboa, sétimos con 6 partidos gañados e 5 perdidos, pero a tan só un triunfo do C.N. Helios, conxunto que ocupa hoxe a terceira e última praza con dereito a disputar o salto de categoría ao termo da Liga.
Guillermo Sánchez iniciou o choque co Arteal superando o ribadumiense Marcos Sanmartín por 3-1. Fernando Padín non foi quen de dobregar a Rafael Taboada nun igualado choque, con 2-3 final. Pero Santosh Araswilli -3-1 sobre Carlos Domínguez e 3-2 a Sanmartín- e Guillermo Sánchez -3-0 a Taboada- pecharon a vitoria cambadesa. Martín Regueiro caeu 0-3 con Domínguez no derradeiro emparellamento.
Pola súa banda, o Liceo Casino dobregou 2-4 o Monteporreiro, con Nigeruk -2-3 a Conic e 1-3 a Prieto- e con Correa -2-3 a Prieto e 0-3 a Fernández- asinando os puntos nun equipo completado por Carlos Santos. O Liceo remata a primeira volta oitavo con cinco triunfos, e con dous de colchón sobre o descenso.