Entre o venres e o domingo haberá na localidade de Parada recitais de poesía, actuacións musicais e espectáculos de danza e audiovisuais
23 ago 2021 . Actualizado a las 12:08 h.A localidade de Parada, no municipio de Folgoso do Courel, acollerá entre os días 27 e 29 a sexta edición do Festival dos Eidos, que o ano pasado tivo que ser suspendido a causa da crise sanitaria. A Fundación Uxío Novoneyra, que organiza estas xornadas culturais, sinala que a nova edición aplicará os protocolos legais de seguridade e prevención contra o coronavirus e adaptará as actividades e aforos a este contexto co obxectivo de crear «un espazo seguro para gozar da cultura».
As actividades previstas para estas xornadas desenvolveranse en diferentes dependencias da casa museo do poeta Uxío Novoneyra e en espazos próximos. Para asistir ao festival é preciso adquirir un abono no portal Ataquilla.com. A continuación detállanse as actividades que se ofrecerán durante estas xornadas.
Venres 27. Ás 16.00 horas poderá verse na antiga escola de Parada o espectáculo audiovisual «Visións inéditas», formado por catro pezas realizadas por Lois Patiño, Xisela Franco, Alfonso Zarauza e Jaione Camborda. Ás 17.30 horas, a compañía Kirenia Danza representará o espectáculo E_migrantas na aira de Parada. Ás 18.30 celebrarase un recital de homenaxe ao poeta Carlos Oroza no que participarán Branca Novoneyra, Javier Romero e Yolanda Castaño. A partir das 20.00 horas haberá actuacións dos músicos Davide Salvado, Califato DJ Set e DJ Tristón.
Sábado 28. Ás 12.00, a escritora Belén Gopegui ofrecerá unha charla baixo o título de «Nuestras voces, nuestras ficciones» no souto da Rubial. Ás 14.00 e ás 15.00 horas haberá actuacións dos músicos Eladio & Uka e Román Gutiérrez, respectivamente, na horta da casa museo. Ás 18.30 habrá un recital poético con Adrià Targa, Chus Pato, Constantino Bértolo e Sonia Marpez. A partir das 20.00 horas ofreceranse actuacións musicais dos artistas Xico de Cariño, Babykatze, Xavi B e Sergio Canay.
Domingo 29. Ás 10.00 e ás 11.00 haberá percorridos de observacións de aves guiados polo biólogo Xavier Vázquez Pumariño no souto da Rubial. Ás 12.00 horas ofrecerase o espectáculo de danza Tres tristes 2.0 na aira de Parada. O festival pecharase con dous concertos a cargo dos músicos Su Garrido Pombo e Xavi B que se ofrecerán a partir das 14.00 horas.