Lacóns protexidos por San Wintila

Rodrigo Fernández
Roi Fernández CHANTADA / LA VOZ

CARBALLEDO

Momento no que José Manuel Mosquera ofrece un lacón na poxa antes da misa de San Wintila
Momento no que José Manuel Mosquera ofrece un lacón na poxa antes da misa de San Wintila ROI FERNÁNDEZ

Poxa en Carballedo polos produtos bendecidos por este santo de nome exótico

14 abr 2021 . Actualizado a las 16:09 h.

A pandemia parouno todo ou case todo, pero a vida segue e algunhas cousas comezan a se recuperar. Está por ver que pasa este ano coas festas populares, pero algunhas das parroquias que as teñen nesta época do ano non se resignan e tratan de celebralas de novo, aínda que sexa con todas as precaucións. Esta fin de semana, por exemplo, na comarca de Chantada celebráronse dúas, a de San Wintila en Carballedo e a do Corpo Santo en Santa Cruz de Viana.

Na aldea de Carballedo, que dá nome a súa parroquia e tamén a este municipio lindeiro con Chantada, os veciños xuntáronse este domingo de novo para celebrar a festa de San Wintila. Despois do parón forzoso do ano pasado, había ganas na parroquia de volver a unha das festas máis tradicionais da zona. O único que faltou este ano foi a parte festiva, pero houbo misa e tamén o que vén sempre despois da misa.

A misa oficiouse cos fregueses diseminados entre o interior da igrexa e o adro, para gardar as distancias entre eles. Despois do oficio relixioso, chegou o momento da poxa. A tradición di que este San Wintila de nome exótico -probablemente orixinario dalgún territorio da actual Romanía- protexe os animais e as colleitas. Por iso, a tradición manda traer á festa lacóns, cachuchas touciños e demais produtos do porco para ofrecerllos ao santo e recadar fondos mediante unha poxa que se fai diante da igrexa. Sempre exactamente no mesmo punto, enriba dunha pedra xunto a unha camelia; hai anos que a fai sempre a mesma persoa, José Manuel Mosquera Bóveda, coñecido polos seus veciños por Cholas.