«O asedio do CD Lugo afectou á traxectoria dos nosos equipos»

O mandatario do Calasancio denuncia que o club lucense xa lles levou un total de quince futbolistas


O Calasancio clausura hoxe a súa temporada coa súa tradicional cea de confraternidade, na que se darán cita unhas trescentas persoas. Aproveitando esta data, o seu presidente, Juan Carlos Díaz, fai unha análise dunha temporada que cualifica de «moi complicada». O mandatario anuncia que seguirá ao fronte do club a vindeira campaña e que competirán na liga promesas feminina co nome do Monte Forte.

-¿Que titular lle pon á temporada?

-Foi unha temporada moi complicada. No persoal perdemos a Álex Blanco, algo que nos marcou moito, e no deportivo descendemos co xuvenil e co infantil á liga provincial. Esperamos compensar algo este desgusto cos cadetes, que esperamos que ascendan mañá.

-¿Como explica estes descensos?

-No infantil era a crónica dunha morte anunciada, porque competimos nunha liga na que xogan todos os filiais e ademais baixan cinco. No tocante ao xuvenil teño que dicir que fixemos unha primeira volta moi boa, pero o partido do Barco marcounos. Sen provocar, futbolistas do noso equipo que marcan as diferenzas recibiron sancións de longa duración. Tamén teño que denunciar o asedio que tivemos por parte do CD Lugo, que xa nos levou 15 futbolistas, que finalmente alí non teñen continuidade. Esa política de terra queimada afectounos moito.

-¿Non hai maneira de tender pontes de colaboración?

-Intentámolo, pero foi peor. A realidade é que o que querían dende o Lugo era manexar o noso club. Eles querían elixir os futbolistas a cambio de nada, e por iso o Calasancio non pasa.

-¿Por onde pasa a solución?

-Porque os pais e os xogadores se conciencien e avalíen se lles interesa estar tirados na estrada catro días a semana para non ter continuidade nun club que ademais non conta con infraestrutura, porque un día adestran en Friol e outro en Cospeito. Estamos nun tempo no que hai unha mentalidade pola que todos pensan que van ser Messis ou Ronaldos. Mentres non cambie isto, estaremos en perigo de perder a categoría.

-¿Vese con ganas de seguir?

-A temporada que ven continuarei como presidente do Calasancio. Non é o momento de abandonar, e máis nun intre de vacas fracas. Imos traballar por corrixir aquilo que fixemos mal e por devolver os equipos as ligas galegas.

-A temporada que ven recuperan o nome do Monte Forte.

-O fútbol feminino sairá co nome do Monte Forte, porque é un club que ten todo o día. Esta campaña faremos un equipo para competir na liga promesas. A seguinte xogaremos na autonómica infantil e cadete, e cando teñamos unha estrutura sólida recuperaremos a categoría sénior.

-¿Haberá moitos cambios na estrutura técnica?

-Carlos Fontal seguirá como director deportivo, pero con máis atribucións. Estará apoiado por máis técnicos. Xa contamos cun novo preparador físico, e nos vindeiros días daremos a coñecer o cadro técnico da vindeira temporada.

-¿Que lectura fai da filialidade Club Lemos-Calasancio?

-Moi positiva, porque os dous clubs temos a mesma filosofía, é dicir, dámoslle protagonismo aos futbolistas da comarca. É un acerto, porque puidemos ver que aspecto presentou a grada da Pinguela co equipo na Primeira Autonómica. Todo isto é posible porque o Club Lemos ten un presidente coas mesmas ideas que defendemos nós. Os dous clubs teñen que ir xuntos, e aí estará o éxito do fútbol local.

-¿Que mensaxe lle envía a afección?

-Agradecerlles o apoio e dicirlles que traballaremos para volver as ligas galegas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«O asedio do CD Lugo afectou á traxectoria dos nosos equipos»