¿Por que comarca de Quiroga e non comarca do Courel?

O grupo C@urel Vivo propón cambiar o nome do territorio e di que sería beneficioso para os tres concellos


quiroga / la voz

O grupo C@urel Vivo anunciou a súa intención de presentar no Concello de Folgoso do Courel unha iniciativa para solicitar o cambio da denominación oficial da comarca. Segundo esta formación política, mudar o nome polo de comarca do Courel «sería beneficioso» para os tres municipios que a integran -Quiroga, Folgoso do Courel e Ribas de Sil- en aspectos como o fomento do turismo e a promoción dos produtos locais.

A este respecto, sinalan que a asociación fundada en tempos recentes polos tres concellos para promover a creación dun parque xeolóxico amparado pola Unesco escolleu chamarse Montañas do Courel «porque o nome ten máis repercusión no exterior» e por entender que «representa á xente dos tres concellos». Desde C@urel Vivo, así mesmo, apuntan que ao realizar buscas de destinos turísticos en Google «sae Courel como a palabra máis buscada entre os termos Caurel, Courel e Quiroga».

O exemplo dos Ancares

Por outro lado, os representantes de C@urel Vivo indican que a comarca dos Ancares recibe o seu nome da serra que a atravesa e consideran que no caso da comarca quiroguesa tamén debería prevalecer a denominación da súa principal característica xeográfica. Aos Ancares -engaden- «non lle chaman comarca de Becerreá por ser a vila de influencia». Neste sentido, o grupo resalta que a Lei de Desenvolvemento Comarcal de Galicia define as comarcas como agrupacións de concellos que comparten unha cohesión interna baseada, entre outros aspectos, nos feitos xeográficos.

Por estes motivos, a formación pedirá aos demais grupos políticos da corporación de Folgoso do Courel que aproben a súa iniciativa e que o Concello solicite posteriormente aos municipios de Quiroga e Ribas de Sil que respalden o cambio do nome oficial da comarca.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

¿Por que comarca de Quiroga e non comarca do Courel?