Turismo informatizado no Courel

Un colectivo xuvenil edita unha web con rutas e mapas descargables


quiroga / la voz

A asociación xuvenil Buraca das Grellas, radicada na localidade de Teixeira, editará mañá na páxina web http://viaxaaocourel.es unha guía turística dixital da Serra do Courel dirixida á xente nova e pensada especialmente para fomentar as visitas durante os meses de outono e inverno. A publicación describe unha trintena de rutas e contén cerca de vinte mapas que poderán descargarse gratuitamente en teléfonos móbiles e aparellos GPS.

As rutas incluídas na guía poden ser percorridas a pé, en bicicleta ou en automóbil. Pero segundo explica Óscar Carrete, membro da asociación, o obxectivo non é só describir itinerarios por camiños tradicionais e por viais asfaltados. «Falamos con empresas turísticas que organizan actividades de espeleoloxía e barranquismo na zona e que ofrecerán descontos aos clientes que cheguen a elas a través da nosa web», sinala.

Os autores da guía indican por outro lado que a súa intención é ofrecer unha información actualizada e veraz e por tal motivo os membros da asociación e algúns colaboradores estiveron percorrendo a serra durante cerca de dous meses, comprobando o estado en que se achan os camiños. «Hai bastantes guías e libros sobre O Courel que presentan con moitos detalles decenas de rutas, pero en moitos casos eses itinerarios non están transitables hoxe en día porque a vexetación pechou os camiños, porque unha ponte está ruinosa ou por outros motivos -apunta Óscar Carrete-, e nós queremos explicar a situación real en que se encontran actualmente as rutas e advertir sobre os problemas con que poden encontrarse os visitantes ao chegar a determinados sitios».

Lugares pouco coñecidos

Por outra parte, a nova guía describe rutas xa coñecidas, pero explica tamén como chegar a algúns lugares que se achan fóra dos circuítos habituais. É o caso da fervenza do Cachón, que se encontra na estrada que vai de Romeor aos Casares. A asociación pretende ademais habilitar proximamente unha ruta ata o pouco coñecido bosque autóctono da Devesa da Teixeira, que tamén será incluída na web.

Con esta guía, o colectivo espera axudar a estimular a actividade turística nos períodos en que a serra acolle a poucos visitantes. «As rutas e actividades que presentamos son accesibles en calquera época do ano e esperamos que axuden a atraer xente en meses como xaneiro ou febreiro, cando as casas de turismo rural da serra case non teñen clientes», comenta Carrete a este respecto. «E tamén queremos mostrar aos visitantes dunha maneira prática as cousas que poden facer na zona cando só se ten un día, ou dous ou tres, para aproveitar o tempo o mellor posible», engade.

Para editar a web e elaborar os mapas descargables requeriuse un investimento de en torno a 1.200 euros, para o cal a asociación contou cunha axuda da Consellería de Traballo. Non obstante, o mantemento da páxina correrá a cargo da asociación. «Aproveitamos tamén a ocasión para comunicar á Xunta que hai moitos camiños en mal estado e varias pontes derrumbadas», comenta Carrete.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos

Turismo informatizado no Courel