Novos itinerarios para observar as aves da Ribeira Sacra

Turgalicia promove na zona catro rutas ornitolóxicas a pé e en bicicleta


monforte / la voz

O repertorio de rutas turísticas da Ribeira Sacra incrementouse co trazado, por parte de Turgalicia, de catro novos itinerarios dedicados á observación das aves neste territorio. Estas rutas son para percorrer en bicicleta ou a pé, a diferenza dos dous primeiros itinerarios ornitolóxicos preparados por esta entidade na zona -difundidos a principios deste ano-, que estaban pensados para facer en automóbil. A descrición de todas estas rutas pode verse nunha sección especial da web de Turgalicia dedicada ao turismo ornitolóxico.

Tres destas novas rutas discorren polo territorio lucense e a cuarta ubícase na provincia ourensá. Dous itinerarios sitúanse no municipio de Sober, un deles entre Bolmente e Ferrón e o outro entre Sampil e o santuario de Cadeiras. A terceira ruta ubícase en Ribas do Sil, entre Augas Mestas e A Covela. A cuarta discorre polo municipio ourensán de Parada de Sil, pasando polos lugares de Castro e Caxide.

Estes itinerarios súmanse ás mencionadas rutas de automóbil, que van de Castro Caldelas a Sober e dos Peares a Castro Caldelas, percorrendo as marxes dereita e esquerda do Sil.

Turgalicia recomenda a Ribeira Sacra xunto con outras nove zonas de Galicia especialmente indicadas para a observación de aves. Na provincia de Lugo figuran tamén neste apartado os humidais da Terra Chá e os montes de Cervantes, na Serra dos Ancares.

Polo momento, as rutas ornitolóxicas promovidas por Turgalicia non inclúen a Serra do Courel, a pesar de que esta zona é a única do sur lucense á que se dedicou de forma exclusiva unha guía de observación de aves en forma de libro, que foi publicada no 2004 pola editorial especializada Lynx.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

Novos itinerarios para observar as aves da Ribeira Sacra