«Sobre a francesada aínda hai moito que investigar»

O investigador e escritor lucense falou en Monforte sobre o impacto da guerra napoleónica na provincia


O historiador lucense Adolfo de Abel Vilela abriu onte na Casa de Cultura de Monforte un breve ciclo de conferencias sobre a invasión francesa de 1809, que hoxe continuará -ás 20.15 horas- cunha charla da escritora monfortina Margarita Rodríguez Otero. De Abel Vilela falou sobre o impacto da guerra napoleónica no conxunto de Galicia e da provincia e na cidade de Lugo.

-Despois de dous séculos, ¿queda moito por averiguar sobre a invasión francesa na provincia?

-Supoño que si, porque a nosa historiografía sobre ese período histórico é bastante cativa, aínda que hai traballos interesantes. Sobre a francesada en Galicia aínda hai moito que investigar e hai moitos aspectos que están praticamente inéditos, pero tamén hai cada vez más investigadores que traballan neste campo. Un problema que temos os historiadores é que en moitos lugares non hai documentación directa sobre aqueles feitos. Eu estou traballando precisamente sobre os sucesos deses tempos en Lugo capital e os arquivos municipais non conservan documentos da época. A investigación que fago é mediante fontes indirectas.

-¿Que importancia tivo o territorio lucense no conxunto de Galicia polo que respecta á guerra napeoleónica?

-Tivo unha importancia considerable. Por exemplo, os ataques a Monforte figuran entre os sucesos máis graves dese período. Tendo en conta o elevado número de vítimas, hai historiadores que os comparan con feitos bélicos tan importantes como o sitio de Xirona, aínda que en Monforte non houbo propiamente choques de tropas. E en Lugo celebrouse en 1808 un encontro moi destacado das xuntas de defensa de Galicia, León e Castela ao que asistiron diplomáticos británicos e no que se marcaron moitos puntos da estratexia que se seguiría durante a guerra. Foi un dos feitos que precederon á proclamación da constitución liberal de 1812.

-Ademais das grandes perdas humanas e materiais que causou en Monforte e en moitos outros lugares, ¿a invasión axudou ao progreso das ideas políticas?

-Eu diría que máis ben sucedeu todo o contrario. Hai que recordar que cando Fernando VII regresou a España en 1813, os deputados ultramontanos -ou sexa, os ultraconservadores- o instaron a abolir a constitución liberal de Cádiz, inspirada nos principios da Revolución francesa, e iso foi o que fixo. Deste xeito, unha vez que terminou a guerra, o resultado foi que España quedou gobernada polo último monarca absolutista de Europa. Aínda que os exércitos de Napoleón axudasen a propagar as ideas liberais, o que quedou despois do seu paso foi un retroceso tremendo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos

«Sobre a francesada aínda hai moito que investigar»