Preparándose para as festas

Os programas dos festexos patronais de Monforte xa están á venda na oficina municipal de turismo e nas librerías


A concelleira de Cultura, Alicia Cadarso, presentou onte no Concello o programa das festas patronais de Monforte e anunciou que os programas están dende onte a tarde á venta na oficina municipal de turismo e nas librerías da cidade. Para aquelas persoas que non desexen adquirir o programa, que custa 1,5 euros, terán á súa disposición na casa da cultura un folio resumo no que se inclúe a programación dos festexos. Tamén se presentou o cartel das festas, elaborado por Roberto González, e no que aparece o cartel feito por seu pai hai 50 anos.

A primeira parte do programa está dedicada ás festas patronais e a segunda ás actividades do verán cultural que se desenvolven nos meses estivais en Monforte. Ao longo das festas desenrolaranse numerosas actividades para os cativos, que incluirán xogos infantís pola mañá e talleres de maxia, títeres e circo polas tardes.

Ademais das actuacións estelares de Mojinos escozíos, Los tigres del Norte, Gwendal e Los secretos, que terán lugar ás 00.30 horas na Praza da Compañía, todos os días haberá actuacións musicais antes e despois dos concertos. O 11 de agosto comezarán os actos previos ás festas, co pregón da escritora Olga Novo, natural da Pobra do Brollón e moi ligada a Monforte, xa que realizou os seus estudos na cidade de Cabe. Tamén terá lugar o concerto pop rock Galicia Central na praza de España a partir das 21.00 horas, no que participarán Sochantre, Momentos de duda, Lapanaback e Alterazión del orden.

O día da patroa sairá da praza de San Antonio unha comitiva formada por autoridades e veciños cara a Igrexa de San Vicente, onde terá lugar unha misa e a ofrenda floral á Virxe de Montserrat.

O sábado 16 de agosto celebrarase o día do gaiteiro e co fin de informar en que barrio tocará cada grupo, o programa inclúe un mapa indicativo. Ás 13.30 horas reuniranse todos os grupos musicais na rúa Cardenal e tocarán ata as tres da tarde.

O programa das festas tamén inclúe un artigo de Francisco Albo, Antón Lopo, Iván Álvarez Menayo e Luís Conde, e unha relación das competicións deportivas que se realizarán con motivo dos festexos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

Preparándose para as festas